Autoriteti i Konkurrencës ka nisur monitorimin e tregut të shitjes me pakicë të produkteve të shportës në rrjetin e supermarketeve kryesore të vendit.
Nisma vjen pas ankesave të qytetarëve dhe shqetësimeve të ngritura nga deputetët e Kuvendit për ecurinë e çmimeve. Monitorimi do të përqendrohet te produktet bazë të konsumit, të cilat ndikojnë drejtpërdrejt në buxhetin e familjeve shqiptare.
Autoriteti bën të ditur se analiza do të përfshijë periudhën nga 1 janari 2025 deri në qershor 2026.
Në fokus do të jenë ecuria e çmimeve, struktura e konsumit dhe të dhënat mbi shitjet në supermarketet kryesore. Sipas Autoritetit të Konkurrencës, supermarketet do të duhet të paraqesin informacion për shitjet totale.
Ato do të raportojnë gjithashtu të dhëna për 30 produktet që zënë peshën më të madhe në shitjet e tyre.
Këto të dhëna do t’i nënshtrohen një analize krahasuese për të vlerësuar sjelljen e tregut dhe funksionimin e konkurrencës. Qëllimi është të shihet nëse tregu i produkteve të shportës funksionon në mënyrë të hapur, konkurruese dhe transparente.
Autoriteti thekson se monitorimi bëhet në funksion të mbrojtjes së interesit publik dhe mirëqenies së konsumatorëve. Ky vendim vjen në një kohë kur rritja e çmimeve të ushqimeve dhe produkteve bazë është kthyer në një nga shqetësimet kryesore për familjet shqiptare.
Nëse nga monitorimi evidentohen problematika, Autoriteti i Konkurrencës mund të ndërmarrë hapa të mëtejshëm sipas kompetencave ligjore. /skyweb.al
