Qeveria miratoi në mbledhjen e djeshme ndryshimet në ligjin “Për sistemin e pagesave”, duke u hapur institucioneve jobankare mundësinë për të marrë pjesë drejtpërdrejt në sistemet ku përpunohen dhe shlyhen transfertat.
Ligji aktual njeh si pjesëmarrës kryesisht Bankën e Shqipërisë, bankat, institucionet financiare tradicionale, operatorët dhe agjentët e shlyerjes. Institucionet e pagesave dhe ato të parasë elektronike nuk përmenden shprehimisht si pjesëmarrëse të drejtpërdrejta.
Ligji i ri i hap rrugën Leku-t digjital, Banka e Shqipërisë ka të drejtën ekskluzive të emetimit
Me projektligjin e ri, në sistem do të mund të hyjnë edhe institucionet e pagesave dhe institucionet e parasë elektronike të licencuara sipas ligjit për shërbimet e pagesave.
Këtu përfshihen kompani që ofrojnë transferta parash, pagesa faturash, portofole elektronike dhe shërbime të tjera digjitale. Ato i ofrojnë tashmë këto shërbime, por në shumë raste varen nga bankat për përpunimin dhe shlyerjen përfundimtare të pagesave.
Ndryshimi u jep këtyre operatorëve mundësinë të lidhen drejtpërdrejt me sistemin, nëse plotësojnë kriteret teknike, financiare dhe të sigurisë të vendosura nga Banka e Shqipërisë.
Në këtë mënyrë, bankat humbasin ekskluzivitetin faktik mbi aksesin e drejtpërdrejtë në infrastrukturën e pagesave, ndërsa operatorët jobankarë mund të konkurrojnë në kushte më të barabarta.
Projektligji përjashton subjektet e vogla që veprojnë me lehtësime të posaçme nga licencimi. Pra, hyrja në sistem nuk do të jetë automatike për çdo kompani apo agjent pagesash.
Ndryshimet synojnë të rrisin konkurrencën, të zvogëlojnë varësinë e operatorëve jobankarë nga bankat ndërmjetëse dhe të krijojnë mundësi për transferta më të shpejta dhe me kosto më të ulëta.
Megjithatë, projektligji nuk vendos ulje të detyrueshme të komisioneve për qytetarët. Efekti mbi tarifat do të varet nga konkurrenca dhe nga kushtet që do të miratojë Banka e Shqipërisë.
Reforma lidhet edhe me përafrimin e Shqipërisë me rregullat e Bashkimit Evropian për pagesat e menjëhershme dhe funksionimin e tregut të pagesave. Komisioni Evropian ka kërkuar zbatimin e mëtejshëm të standardeve të BE-së në këtë sektor. /skyweb.al
