Policia e Tiranës finalizoi operacionin “Illegal Trade”, duke kontrolluar 8 subjekte që tregtonin produkte të markave luksoze.
Mes 9 personave të proceduar penalisht është edhe Gjergji Hysi, pronari i dyqanit të njohur “Prive Brands”.
Gjatë kontrolleve u sekuestruan celularë, kompjuterë, çanta dhe veshje të dyshuara si të kontrabanduara.
Sipas Policisë, produktet nuk kishin dokumentacion që provonte origjinën dhe zhdoganimin, ndërsa të ardhurat nga shitjet nuk deklaroheshin.
View this post on Instagram
Materialet procedurale i janë referuar Prokurorisë së Tiranës për hetime të mëtejshme.
NJOFTIMI I POLICISE
Konstatohen 8 subjekte ku shiteshin pajisje, si dhe veshje dhe aksesorë të markave luksoze, të dyshuara të kontrabanduara.
Procedohen penalisht 9 administratorë/përfaqësues të subjekteve, të cilët nuk deklaronin të ardhurat.
Sekuestrohen pajisje elektronike dhe produkte të markave luksoze.
Si rezultat i verifikimeve të vazhdueshme dhe hetimeve të kryera nga specialistët e Seksionit për Hetimin e Krimit Ekonomik dhe Financiar, me qëllim goditjen e paligjshmërive në këtë fushë, u finalizua në bashkëpunim me Prokurorinë, operacioni i koduar “Illegal trade”, në kuadër të të cilit, në zbatim të vendimit të Gjykatës, u kryen kontrolle në 8 subjekte me aktivitet në fushën e tregtimit të produkteve të markave luksoze.
Nga kontrollet në këto subjekte u sekuestruan: 16 aparate celularë, 10 njësi kompjuterike, 1 laptop, 11 çanta dhe veshje të markave luksoze, pa dokumentacion shoqërues që provon origjinën dhe zhdoganimin. Gjithashtu, nga verifikimet e mëtejshme rezultoi se të ardhurat nga shitjet e tyre nuk deklaroheshin në organet tatimore, dhe se në njërin subjekt, shiteshin produkte, pa kuponë. Për këtë të fundit u mor masa e pezullimit të ushtrimit të aktivitetit.
