Banka e Shqipërisë ka ulur sërish normën maksimale efektive të interesit për kreditë konsumatore me vlerë deri në 200 mijë lekë. Për gjysmën e dytë të vitit 2026, institucionet financiare nuk mund të aplikojnë një NEI më të lartë se 51.37% për këtë kategori kredish.
Kufiri i ri është më i ulët se niveli 54.8% i gjysmës së parë të vitit dhe ndjeshëm poshtë normës 62.2% të aplikuar një vit më parë.
NEI përfshin jo vetëm interesin nominal, por edhe komisionet dhe kostot e tjera që i ngarkohen klientit gjatë marrjes së huasë. Për kreditë e vogla deri në 200 mijë lekë, tavani llogaritet tashmë mbi mesataren e normave efektive të gjashtëmujorit të mëparshëm, pa shtesën prej një të tretës që përdorej më herët.
Për shumat mbi 200 mijë lekë, formula mbetet më e favorshme për huadhënësit, pasi mesatares së gjashtëmujorit të kaluar i shtohet ende një e treta.
Në të njëjtën kohë, rregullat e reja kërkojnë që komisionet e kredisë konsumatore të paguhen në momentin e disbursimit dhe jo të shpërndahen përgjatë gjithë afatit të huasë.
Për overdraftet deri në 200 mijë lekë, tavani i interesit është ulur lehtë në 18.07%, nga 18.27%.
Ndryshe ka ndodhur me kreditë nga 200 mijë deri në 600 mijë lekë, ku NEI maksimal është rritur në 37.4%, nga 35.43%.
Për kreditë nga 600 mijë deri në 2 milionë lekë, kufiri është ulur në 14.46%, nga 14.71%.
Tavani i interesit u vendos për herë të parë në vitin 2022 për të frenuar kreditë me kosto shumë të lartë, sidomos nga institucionet financiare jobanka. Atëherë, norma maksimale për kreditë e vogla arrinte në 171.41%, ndërsa sot është ulur në 51.37%.
Megjithëse rënia është e fortë, një normë mbi 50% tregon se kreditë e vogla dhe afatshkurtra vijojnë të jenë ndër produktet më të kushtueshme për konsumatorët.
