Çmimi mesatar i shitjes së apartamenteve në Tiranë ka arritur një nivel rekord prej 2,141 euro për metër katror në tremujorin e parë të vitit 2026.
Sipas indeksit “Keydata Albania” të “Çelësi Media Group”, të cilave u referohet Monitor, çmimi median në kryeqytet është ngjitur në 2,046 euro për metër katror.
Të dhënat tregojnë se çmimet e apartamenteve në Tiranë janë më shumë se dyfishuar gjatë shtatë viteve të fundit.
Në tremujorin e parë të vitit 2019, çmimi mesatar ishte 964 euro për metër katror, ndërsa në të njëjtën periudhë të vitit 2026 ka arritur në 2,141 euro, me një rritje prej 122%.
Krahasuar me vitin 2005, kur çmimi mesatar ishte 664 euro për metër katror, apartamentet janë shtrenjtuar me rreth 222%.
Rritja më e madhe vijon të regjistrohet në zonën e ish-Bllokut, ku çmimi mesatar ka arritur në 3,003 euro për metër katror.
Në këtë zonë, çmimet janë rritur me rreth 90% krahasuar me tremujorin e parë të vitit 2022.
Brenda Unazës së Vogël, çmimi mesatar i shitjes është 2,431 euro për metër katror, nga 1,269 euro që ishte katër vite më parë.
Edhe jashtë Unazës së Vogël çmimet kanë shënuar rritje të fortë, duke arritur në 2,022 euro për metër katror.
Krahasuar me tremujorin e parë të vitit 2022, çmimet jashtë Unazës janë rritur me mbi 91%.
Në tremujorin e parë të vitit 2026, çmimet mesatare në Tiranë u rritën me 2.4% krahasuar me fundin e vitit 2025.
Çmimet mediane u rritën me 4.5%, ndërsa indeksi real i çmimeve shënoi një rritje prej 9.5%.
Nga tremujori i parë i vitit 2020 deri në tremujorin e parë të vitit 2026, çmimi real i shitjes së apartamenteve në Tiranë është rritur me 117%.
Raporti thekson se çmimet mesatare ndikohen edhe nga numri dhe lloji i apartamenteve të nxjerra në shitje gjatë një periudhe të caktuar.
Megjithatë, të dhënat konfirmojnë vijimin e shtrenjtimit të fortë të banesave në kryeqytet, si në zonat qendrore, ashtu edhe në periferi.
