Shqipëria po tërheq gjithnjë e më shumë vizitorë nga vendet nordike dhe Europa Qendrore e Lindore, ndërsa zgjerimi i lidhjeve ajrore po e bën Tiranën gjithnjë e më të aksesueshme.
Të dhënat e INSTAT tregojnë se gjatë qershorit 2026 hyrjet nga Europa Veriore arritën në 85,688, nga 63,753 një vit më parë, duke shënuar një rritje prej 34.4%.
Edhe më e fortë ishte ecuria nga Europa Qendrore dhe Lindore, me 172,436 hyrje, kundrejt 132,344 në qershor 2025, ose rreth 30.3% më shumë.
Rritja e interesit nga këto tregje po ecën paralelisht me zgjerimin e shpejtë të rrjetit të fluturimeve direkte nga Aeroporti Ndërkombëtar i Tiranës.
Vetëm këtë vit janë shtuar lidhje të reja me qytete të Europës Veriore dhe Qendrore, mes tyre Stokholmi, Billundi, Helsinki dhe Talini. Wizz Air, Ryanair dhe kompani të tjera kanë shtuar një numër të konsiderueshëm linjash dhe frekuencash nga Tirana.
Rritja e trafikut u reflektua edhe në një rekord të ri gjatë muajit qershor. Më 22 qershor TIA regjistroi 318 nisje dhe mbërritje avionësh brenda 24 orëve, niveli më i lartë deri në atë moment. Rekordi u tejkalua më pas më 6 korrik, kur u regjistruan 322 fluturime.
Qershori solli gjithashtu edhe një zhvillim historik, me nisjen e fluturimit të parë direkt transoqeanik Tiranë-Toronto, duke lidhur për herë të parë Shqipërinë pa ndalesë me Amerikën e Veriut.
Rritja e linjave të reja, destinacioneve dhe frekuencave e ka konsoliduar TIA-n si portën kryesore ajrore të Shqipërisë drejt Europës dhe tashmë edhe drejt destinacioneve përtej Atlantikut.
Në total, gjatë qershorit hynë në Shqipëri 1.346 milionë shtetas të huaj, ndërsa në gjashtëmujorin e parë numri i hyrjeve kaloi 5 milionë, 6.2% më shumë se një vit më parë. /skyweb.al
