Është zgjeruar skandali i kredive të marra përmes mashtrimit nga 33-vjeçarja Donika Curri.
Skyweb.al mëson nga burime policore se krahas Lezhës, ku dyshohet se Curri mashtroi 23 gra duke aplikuar për kredi në emrin e tyre në IUTE Credit, tashmë është zbuluar se “aktiviteti” i saj është shtrirë edhe në Tiranë.
EKSKLUZIVE/ Mashtrimi me kreditë në UITE Credit në Lezhë, ndërhyn Banka e Shqipërisë
Policia e kryeqytetit ka marrë sëfundmi një denoncim nga një 25-vjeçare, e afërme e Donika Currit, e cila ka zbuluar se kjo e fundit kishte aplikuar për kredi te IUTE Credit përmes së njëjtës skemë që kishte ndjekur në Lezhë.
Burime bëjnë me dije se Curri kishte marrë kartën e identitetit të 25-vjeçares përmes së cilës kishte kryer më pas aplikimin për kredi në shumën 3 500, e cila ishte aprovuar dhe disbursuar.
Për të aplikuar për kredi nëpërmjet aplikacionit MyIUTE duhen të dhënat e kartës së identietit si edhe një foto live. Nuk dihet se si ka mundur ta marrë Donika Curri foton LIVE të së afërmes së saj, por duket se kemi të bëjmë sërish me një shkelje të kushteve të identifikimit në distancë.
Skyweb.al ka raportuar gjerësisht në lidhje me skandalin e mashtrimit të 23 grave në Lezhë, të cilave Curri iu është prezantuar si punonjëse e një organizate bamirëse dhe pasi u mori kartat e identitetit dhe foto, u premtoi përfitime nga projekte ambasadash, porn ë fakt aplikoi për kredi në IUTE Credit në emrin e tyre.
Zgjerimi i skandalit të kredive nxjerr në pah mungesat që mbart praktika e identifikimit në distancë dhe problemet me verifikimin e aftësive paguese të klientit, probleme për të cilat Banka e Shqipërisë u tha dje redaksisë së kishte nisur marrjen e informacionit për të parë mungesat në këtë praktikë. /skyweb.al
