Prokuroria e Posaçme kundër Korrupsionit dhe Krimit të Organizuar ka regjistruar një procedim penal lidhur me kontratën koncesionare të Aeroportit Ndërkombëtar të Vlorës. Skyweb.al mëson se “procedimi është në fazën e hetimeve paraprake”, ndërsa objekt i hetimit janë elementët ligjorë, përfshirë procedurat e dhënies së kontratës, si dhe kushtet financiare dhe ndërtimore të projektit.
Hetimi nis në një moment ku aeroporti ishte tashmë drejt përfundimit dhe kishte kaluar në fazën teknike të testimeve. Disa avionë janë ulur në pistë gjatë javëve të fundit, ndërsa infrastruktura ishte inaguruar zyrtarisht dhe pritej të niste funksionimin komercial gjatë muajve në vijim.
Aeroporti i Vlorës është prezantuar si një projekt strategjik për zhvillimin e jugut të vendit dhe turizmit elitar, por kontrata koncesionare për ndërtimin dhe menaxhimin e tij ka qenë prej kohësh objekt polemikash për mungesë transparence, procedura të dyshimta dhe favorizime në procesin e përzgjedhjes së kompanive zbatuese.
Redaksia mëson se SPAK po heton edhe aspektet teknike dhe financiare të marrëveshjes, duke përfshirë angazhimet buxhetore të shtetit shqiptar, vlerësimet e fizibilitetit ekonomik, si dhe standardet e ndërtimit dhe cilësisë së punimeve. Në këtë kuadër, nuk përjashtohet mundësia që në fokus të hetimit të jetë edhe modifikimi i kushteve të kontratës pas nënshkrimit apo devijime nga projekti fillestar.
Me nisjen zyrtare të hetimeve nga SPAK, Aeroporti i Vlorës, i menduar si porta e dytë ajrore e vendit pas Rinasit, përballet me një klimë të re pasigurie institucionale dhe ligjore. Reagimet nga autoritetet qeveritare mbi këtë zhvillim mungojnë për momentin, ndërsa pritet që hetimi të shtrihet në disa drejtime: nga mënyra e dhënies së koncesionit, tek aktorët përfitues dhe roli i institucioneve shtetërore përgjegjëse në mbikëqyrje dhe zbatim. /skyweb.al
