Wizz Air ka mbyllur tremujorin prill–qershor 2026 me një humbje neto prej 198.2 milionë eurosh, duke përmbysur rezultatin pozitiv të së njëjtës periudhë të një viti më parë.
Në tremujorin përkatës të vitit të kaluar, kompania ajrore kishte regjistruar një fitim neto prej 38.4 milionë eurosh.
Humbja erdhi pavarësisht rritjes së numrit të udhëtarëve dhe zgjerimit të operacioneve të kompanisë.
Wizz Air transportoi 21.2 milionë pasagjerë, rreth 25% më shumë se një vit më parë, ndërsa të ardhurat u rritën me 5.5%, duke arritur në rreth 1.51 miliardë euro.
Problemi kryesor për kompaninë ishin kostot operative, të cilat u rritën ndjeshëm gjatë tremujorit.
Shpenzimet për karburantin u rritën me rreth 39%, ndërsa kostoja për njësi e karburantit u rrit me 21%.
Në të njëjtën kohë, të ardhurat mesatare për çdo vend të ofruar ranë me rreth 8%, teksa Wizz Air vijoi zgjerimin agresiv të kapaciteteve.
Si rezultat, kompania regjistroi edhe një humbje operative prej 183.3 milionë eurosh, kundrejt fitimit operativ të shënuar një vit më parë.
Ndërkohë për Wizz Air mbetet ende problem bllokimi i dhjetëra avionëve në hangarë për shkak të problemeve me motorët Pratt & Whitney GTF. /skyweb.al
