Tetë qarqe të vendit pritet të përballen këtë fundjavë me rrezik të lartë për përhapjen e zjarreve, në një kohë kur temperaturat do të ngjiten deri në 39 gradë Celsius. Paralajmërimi vjen nga Instituti i Gjeoshkencave përmes Buletinit të Rreziqeve, i cili thekson se kushtet atmosferike favorizojnë përhapjen e flakëve, sidomos në zonën e Ultësirës Perëndimore.
Sipas institutit, qarqet më të rrezikuara janë Lezha, Durrësi, Tirana, Elbasani, Fieri, Berati, Gjirokastra dhe Vlora. Ndërsa në Shkodër, Kukës, Dibër dhe Korçë rreziku vlerësohet më i ulët, edhe aty pritet që në zona të caktuara të ketë vatër me rrezik të lartë.
Nga ana tjetër, Agjencia për Media dhe Informim bëri të ditur se zjarret në Dajt dhe në Priskë janë shuar plotësisht. Në qarqe të tjera, strukturat vendore dhe Forcat e Armatosura vijojnë punën për mbajtjen nën kontroll të situatës.
Në Çikallesh të Kavajës dhe në Mallakastër, flakët janë izoluar, ndërsa situata paraqitet nën kontroll. E stabilizuar raportohet edhe gjendja në Plan të Bardhë në Klos.
Ndërkohë, në Kostren 2 të Beratit dhe në Uruç të Peqinit, vatrat janë shuar pas ndërhyrjes së forcave operacionale. Aktive mbetet ende një vatër në Alikomemaj të Memaliajt, ku autoritetet po vijojnë punën për neutralizimin e plotë.
Institucionet u bëjnë thirrje qytetarëve të tregojnë kujdes maksimal, pasi temperaturat e larta dhe era mund të favorizojnë riaktivizimin dhe përhapjen e shpejtë të zjarreve.
