Kryetari i Bashkisë së Kamzës, Rakip Suli, ka publikuar në rrjetet sociale pamje nga angazhimi i zjarrfikësve të bashkisë në një aksion për shuarjen e zjarreve në Krujë, duke e cilësuar ndërhyrjen e tyre si një akt heroik.
Por pamjet e shpërndara prej vetë kryebashkiakut nxjerrin në pah një tjetër problem, kushtet me të cilat zjarrfikësit po përballen me flakët.
Në video, disa prej zjarrfikësve shfaqen pa kaska mbrojtëse, pa uniforma të posaçme kundër zjarrit dhe pa pajisje termoizoluese, ndërsa ndërhyjnë në një zonë me rrezik të lartë.
Në vend të veshjeve të posaçme, ata duken me bluza të zakonshme dhe mjete minimale, duke u ekspozuar drejtpërdrejt ndaj temperaturave të larta dhe tymit.
Ndërkohë që Suli e shoqëron postimin me tone heroike dhe mesazhe për “luftën me flakët”, pamjet ngrenë pikëpyetje mbi mënyrën se si janë pajisur strukturat e MZSH-së në Bashkinë Kamëz, por jo vetëm aty.
Heroizmi dhe angazhimi i zjarrfikësve nuk vihet në diskutim, por pikërisht rreziku që ata marrin përsipër kërkon standarde minimale sigurie dhe pajisje profesionale.
Në një sezon ku zjarret janë kthyer në një nga emergjencat kryesore në vend, mbrojtja e atyre që dërgohen në vijën e parë duhet të jetë po aq prioritet sa edhe vetë shuarja e flakëve. /skyweb.al
