Agjencia Shtetërore e Kadastrës ka sqaruar procedurën për kalimin e tokës bujqësore nga përdorimi në pronësi, duke përcaktuar kushtet që duhet të plotësojnë qytetarët për të përfituar.
Procesi zhvillohet sipas blloqeve kadastrale, ndërsa Drejtoria Vendore e Kadastrës shqyrton njëkohësisht kërkesat e paraqitura për të njëjtën zonë.
Për t’u përfshirë në proces, qytetari duhet të ketë paraqitur kërkesë pranë njësisë së vetëqeverisjes vendore deri më 7 nëntor 2020, të jetë përdorues faktik i tokës dhe të mos ketë përfituar më parë titull pronësie për të.
Një tjetër kusht është që kryefamiljari të ketë qenë anëtar i ish-kooperativës ose ndërmarrjes bujqësore, si dhe të vërtetohet banimi në territorin përkatës.
Kadastra sqaron se toka duhet të jetë arë, pemëtore, vreshtë ose ullishte, të mos jetë në pronësi të personave të tretë dhe të mos jetë pjesë e investimeve strategjike apo proceseve të kompensimit.
Po ashtu, sipërfaqja që kërkohet të kalojë në pronësi nuk duhet të jetë e zënë me ndërtime pa leje.
Pas verifikimeve në terren dhe përgatitjes së dokumentacionit tekniko-ligjor, lista e përfituesve afishohet për 30 ditë dhe më pas i kalon Këshillit Bashkiak për miratim.
Në përfundim të procedurës, përfituesi pajiset me vendimin për kalimin e tokës bujqësore nga përdorimi në pronësi, dokument që më pas mund të regjistrohet në regjistrin kadastral.
