Në qershor të vitit të kaluar, qeveria e Shqipërisë miratoi përmes një vendimi të posaçëm ndërtimin e një centrali diellor me fuqi 62 megavat në fshatin Taç të Kolonjës.
Sipas vendimit, projekti do të shtrihej në një sipërfaqe prej 412 hektarësh dhe kompania përfituese e saj ishte Fortis Energy and Construction. Kjo kompani zotërohet nga një biznesmen turk i quajtur Mehmet Uckardes.
Dhënia në përdorim e një sipërfaqe kaq të madhe, kishte një pasojë të drejtëpërdrejtë në banorët e zonës. Ajo rrezikonte të ardhurat dhe jetesën e tyre.
Të padëgjuar nga institucionet e shtetit të tyre, atëherë nuk ishte shpikur as pasqyra dhe as prania besnike, banorët e fshatit Taç i Sipërm u ngritën në protesta në muajin janar të këtij viti.
Banorët treguan se në këto sipërfaqe kullosore prej vitesh ushtrojnë aktivitetin mbi 40 blegtorë të zonës, të cilët mbajnë dele dhe lopë. Ata u shprehën se marrja e këtyre kullotave rrezikon drejtpërdrejt jetesën e familjeve që varen nga blegtoria.
Sipas tyre, këto toka janë përdorur tradicionalisht nga komuniteti dhe përbëjnë burimin kryesor të mbijetesës për fshatin.
“Si do të jetojmë ne? Këto janë kullotat e fshatit. Me to ka jetuar ky fshat. Nëse na i marrin, ku do t’i çojmë bagëtitë? Janë rreth 40 fermerë që kullosin dele dhe lopë në këto toka”, u shprehen banorët.
Por protestat e tyre ranë në veshë të shurdhër. Pas vendimit të qeverisë, Erion Isai dhe Këshilli Bashkiak i Kolonjës miratuan me shpejtësi lejet e tjera të nevojshme për projektin. Ndërsa në maj të këtij muaji Këshilli Kombëtar i Territorit miratoi edhe lejen e ndërtimit duke i hapur rrugë nisjes së ndërtimit të parkut fotovoltaik.
Banorët pretendojnë se disponojnë dokumenta pronësie për një pjesë të tokave që bien brenda sipërfaqes së madhe 412 hektarë, që u rrëmbye nga biznesmeni turk, dhe se për këtë çështje kanë bërë kallëzim në prokurori. Sipas tyre, çështja tashmë ndodhet në gjykatë për shqyrtim themeli.
“Ne kemi tapi për tokat. Ata na i kanë zënë dhe ne i kemi hedhur në gjyq. Tani presim të shohim si do të përfundojë”, thonë banorët.
Por përfundimi është i ditur tashmë. Kompania turke, po vazhdon përpara me ndërtimin. Kullotat dhe tokat me të cilat banorët e Taçit të Sipërm kishin të lidhur jetesën e tyre, tashmë po shkatërrohen nga mbivendosja e paneleve masive. /kapitali.al
