Është zhvilluar së fundmi një tjetër sesion i ritestimit për drejtuesit e automjeteve që u është revokuar leja e drejtimit për shkak të shkeljeve të rënda të rregullave të qarkullimit rrugor.
Të dhënat zyrtare nga Drejtoria e Përgjithshme e Shërbimeve të Transportit Rrugor (DPSHTRR) tregojnë një nivel të ulët kalueshmërie në këtë proces. Nga 52 kandidatë të riregjistruar, vetëm 32 u paraqitën fizikisht në provim, ndërsa vetëm 8 prej tyre arritën të kalojnë testin dhe të rifitojnë të drejtën për të drejtuar automjetin.
Që prej fillimit të kësaj nisme në qershor të vitit 2022, janë riregjistruar në autoshkolla 1,994 individë që kishin humbur lejen e drejtimit, por vetëm 263 prej tyre – rreth 13.1% – kanë kaluar me sukses provimin, duke u rikthyer si drejtues mjetesh në rrugë.
Sipas DPSHTRR, këto statistika pasqyrojnë nivelin e lartë të kërkesave që vendosen ndaj kandidatëve dhe synimin për të përzgjedhur drejtues më të përgjegjshëm në trafik. Institucioni u bën apel qytetarëve që të përgatiten seriozisht përmes Programit të Normave të Sjelljes dhe të përdorin platformat online për simulimin e testit teorik, në mënyrë që të rrisin shanset për sukses dhe të kthehen në rrugë me një ndërgjegje të re. /skyweb.al
