Pas viteve të “fast fashion”, kur një veshje e dëmtuar zëvendësohej menjëherë me një të re, kompanitë e mëdha të modës po rikthejnë një praktikë të vjetër: riparimin e rrobave.
Nga Levi’s dhe Uniqlo te Zara, Primark dhe Patagonia, gjithnjë e më shumë marka po investojnë në shërbime për ndreqjen, përshtatjen dhe riciklimin e veshjeve, duke synuar njëkohësisht zgjatjen e jetës së produkteve dhe mbajtjen e klientëve më pranë markës.
Ndryshimi lidhet edhe me koston e lartë të jetesës. Konsumatorët, veçanërisht të rinjtë, po kërkojnë mënyra për të përdorur më gjatë rrobat që kanë, në vend që t’i zëvendësojnë menjëherë.
Levi’s ka krijuar shërbime riparimi dhe personalizimi në shumë dyqane, ndërsa organizon edhe kurse ku të rinjtë mësojnë të qepin një kopsë të rregullojnë një grisje apo të shkurtojnë një veshje.
Uniqlo, përmes programit RE.UNIQLO Studio, ofron riparime, qëndisje dhe përshtatje të rrobave. Produktet që nuk mund të riparohen mund të dhurohen ose riciklohen.
Edhe Zara ka futur shërbime për rregullimin e zinxhirëve, kopsave, tegelave dhe gjatësisë së veshjeve, ndërsa përmes platformës Zara Pre-Owned lejon edhe shitjen e rrobave të përdorura.
Primark po organizon workshop-e me emrin “Love It For Longer”, ku klientët mësojnë si të mirëmbajnë dhe riparojnë rrobat e tyre.
Patagonia prej vitesh u jep mundësi klientëve të dërgojnë produktet për riparim, riciklim ose zëvendësim, ndërsa ofron edhe udhëzime për ndërhyrje të thjeshta që mund të bëhen në shtëpi.
Tendenca lidhet edhe me shqetësimin për ndikimin mjedisor të industrisë së modës. Sipas të dhënave të cituara nga Associated Press, prodhimi global i veshjeve pothuajse u dyfishua nga viti 2000 deri në 2015, ndërsa numri mesatar i herëve që përdoret një veshje ra me rreth 36%.
Më pak se 1% e materialeve të përdorura për veshje përfundon sërish në prodhimin e rrobave të reja.
Por strategjia nuk është vetëm “e gjelbër”. Riparimi krijon një marrëdhënie të re mes klientit dhe markës: dyqani nuk është më vetëm vendi ku blihet një produkt, por edhe vendi ku ai rikthehet për t’u riparuar, përshtatur apo ricikluar.
Për kompanitë, kjo do të thotë më shumë kontakte me konsumatorin dhe potencialisht më shumë besnikëri ndaj markës.
Megjithatë, ekspertët paralajmërojnë se riparimi i veshjeve nuk mjafton për të zgjidhur problemin e mbetjeve të industrisë së modës, për sa kohë prodhimi masiv i rrobave të reja vazhdon të rritet. /skyweb.al
