Turizmi vijoi rritjen në qershor, por të dhënat e reja të INSTAT tregojnë një zhvillim interesant, ku numri i turistëve po rritet dukshëm më shpejt se net-qëndrimet, sinjal që tregon vizitorët po kalojnë më pak net në strukturat akomoduese.
Në qershor 2026, hotelet dhe strukturat e tjera pritën 586,608 vizitorë, nga të cilët 445,846 ishin të huaj. Numri total u rrit me 17% krahasuar me një vit më parë, ndërsa të huajt shënuan rritje prej 20.6%.
Megjithatë, net-qëndrimet e turistëve të huaj u rritën vetëm me 9.2%. Diferenca mes dy treguesve nënkupton se qëndrimi mesatar i një turisti të huaj është shkurtuar me rreth 9.5% krahasuar me qershorin e kaluar.
Rritjen më të fortë e mori bregdeti. Strukturat në zonat bregdetare akomoduan 323,426 turistë të huaj, nga 253,867 një vit më parë, ose rreth 27.4% më shumë. Në zonat jo-bregdetare rritja ishte vetëm 5.7%, në 122,420 vizitorë.
Një tjetër zhvillim i fortë vjen nga apartamentet, shtëpitë e pushimit dhe akomodimet e tjera afatshkurtra. Numri i turistëve të huaj në këtë kategori u rrit nga 27,227 në 39,457, ose me afro 45% brenda një viti. Edhe vizitorët vendas në këto struktura u rritën me rreth 47%.
Hotelet mbeten ndërkohë forma dominuese e akomodimit, duke pritur 401,836 turistë të huaj, rreth 19.5% më shumë se në qershor 2025.
Por pavarësisht rritjes së fortë të turistëve, kapacitetet hoteliere mbeten larg shfrytëzimit të plotë. Norma e zënies së dhomave ishte 41.3%, nga 39.5% një vit më parë, një përmirësim prej vetëm 1.8 pikë përqindjeje.
Sipas rajoneve, Veriu shënoi rritjen më të fortë të turistëve të huaj, me rreth 26.7%, në 123,261 vizitorë. Në Jug numri arriti në 141,405, rreth 19.6% më shumë, ndërsa rajoni Qendër regjistroi 181,180 turistë të huaj, me rritje rreth 17.5%.
Kosova mbetet tregu më i madh, me 15% të turistëve të huaj të akomoduar, e ndjekur nga Italia me 14% dhe Polonia me 13%. Franca dhe Gjermania përfaqësojnë nga 7% secila. /skyweb.al
