Problemet me sistemet dixhitale të shtetit po zgjerohen nga një institucion te tjetri. Pas kaosit të krijuar nga problemet me fiskalizimin e faturave në sistemin e Tatimeve, tashmë prej më shumë se 48 orësh jashtë funksionit normal rezulton edhe sistemi elektronik i Qendrës Kombëtare të Biznesit.
Në faqen e QKB-së mund të kërkohen subjektet, por sistemi nuk gjeneron dokumentacionin që deri më parë ishte i aksesueshëm normalisht për publikun.
Praktikisht, është bërë e pamundur të shkarkohen ekstrakte të kompanive, dokumente historike, pasqyra financiare apo të dhëna të tjera të depozituara, duke krijuar një lloj “terri” informativ mbi bizneset e regjistruara në vend.
Nëse kërkon të verifikosh aksionarët apo ortakët e një kompanie, historikun e ndryshimeve ose bilancet e saj, dokumentet që deri pak ditë më parë gjeneroheshin nga sistemi nuk dalin më.
Problemi shfaqet pothuajse paralelisht me anomalitë e sistemit të Tatimeve, ku mijëra fatura të lëshuara nga bizneset dhe të pranuara nga sistemi kanë rezultuar të pafiskalizuara, duke krijuar probleme në shlyerjen e tyre nga subjektet pritëse.
Pas mega skandalit të AKSHI-t, administrimi dhe mirëmbajtja e një pjese të sistemeve shtetërore, kontratat e të cilave me operatorët privatë kishin përfunduar, u mor përsipër nga Albanian Digital Solution, kompania shtetërore e krijuar në fushën e teknologjisë së informacionit.
Por problemet e ditëve të fundit ngrenë pikëpyetje nëse modeli i ri po arrin të garantojë vazhdimësinë dhe funksionimin normal të infrastrukturës kritike dixhitale të shtetit.
Deri tani nuk ka një sqarim publik të plotë mbi shkakun e problemit në QKB dhe as një afat se kur shërbimi do të rikthehet normalisht. /skyweb.al
