Një ndryshim relativisht i vogël në lartësinë e fluturimit mund të ndihmojë në uljen e ndikimit të aviacionit mbi klimën.
Britania e Madhe, në bashkëpunim me Google, ka nisur një eksperiment që synon të reduktojë krijimin e vijave të bardha që avionët lënë pas në qiell, të njohura si contrails.
Projekti, i quajtur “Operation Blue Skies”, do të zgjasë rreth 30 muaj dhe do të zhvillohet në një zonë të hapësirës ajrore mbi Atlantikun.
Gjatë testimeve, kontrollorët e trafikut ajror do t’u kërkojnë disa avionëve të ndryshojnë lartësinë e fluturimit deri në rreth 610 metra, për të shmangur shtresat atmosferike ku ka më shumë gjasa të krijohen vijat e kondensimit.
Contrails formohen kur avujt e ujit që dalin nga motorët e avionëve ngrijnë në ajrin shumë të ftohtë në lartësi të mëdha.
Në kushte të caktuara, këto gjurmë mund të qëndrojnë për orë të tëra dhe të përhapen, duke krijuar shtresa të holla resh.
Problemi është se këto re mund të pengojnë largimin e një pjese të nxehtësisë nga Toka drejt hapësirës, duke shtuar efektin e ngrohjes.
Në eksperiment pritet të përfshihen rreth 10 mijë fluturime, por ndryshimi i lartësisë nuk do të zbatohet për çdo avion.
Devijimet do të bëhen vetëm në rastet kur parashikimet meteorologjike tregojnë se ekziston rrezik i lartë për formimin e contrails.
Google po përdor inteligjencën artificiale dhe të dhënat meteorologjike për të identifikuar paraprakisht zonat ku këto gjurmë kanë më shumë gjasa të krijohen.
Nëse eksperimenti rezulton efektiv dhe me kosto të përballueshme, metoda mund të kthehet në një nga mënyrat më të shpejta për të reduktuar një pjesë të ndikimit klimatik të aviacionit, ndërsa sektori vazhdon kërkimin për karburante dhe teknologji më të pastra. /skyweb.al
