Të kalosh natën brenda një Boeing 747 zakonisht lidhet me një fluturim të gjatë, por në Malajzi dy prej avionëve më të famshëm në historinë e aviacionit janë shndërruar në hotel.
Në qytetin Johor Bahru, 1975 Avenue & Hotel ka transformuar dy avionë Boeing 747 në 18 suita, duke krijuar një kompleks turistik me tematikë aviacioni.
Dy avionët, të quajtur Bove dhe Bey, dikur ishin projektuar për të transportuar qindra pasagjerë. Sot, brenda tyre ndodhen dhoma hoteli të ndara në dy kate, me krevat “king-size”, vaskë të veçantë, dush “rain shower” dhe ambient ndenjeje.
Suitat u hapën pjesërisht për publikun gjatë muajit gusht dhe secila prej tyre ka një tematikë të frymëzuar nga vende të ndryshme, mes tyre Malajzia, Japonia, Indonezia, Tajlanda, Kina, Çekia, Anglia, Italia dhe Zvicra.
Çdo suitë mund të strehojë deri në tre persona. Për muajin shtator, çmimet variojnë nga rreth 361 euro deri në 589 euro nata, në varësi të kategorisë së dhomës.
Kompleksi nuk kufizohet vetëm te avionët. Në dispozicion të vizitorëve janë restorante, palestër, dhomë me avull, pishinë në tarracë, jacuzzi, pishinë me plazh artificial dhe një park ujor për fëmijët.
Hoteli ka gjithashtu Gem Spa & Wellness, ku ofrohen trajtime relaksuese dhe terapi wellness, ndërsa restoranti japonez The Hanareya @ 1975 ofron sushi, sashimi dhe pjata me mish wagyu.
Për ata që nuk ndihen rehat me idenë e të fjeturit brenda një avioni, kompleksi ofron edhe 20 dhoma tradicionale hotelinë një ndërtesë të veçantë.
1975 Avenue & Hotel ndodhet pranë Aeroportit Ndërkombëtar Senai dhe jo larg Johor Premium Outlets, një qendër tregtare me rreth 150 dyqane markash.
Dy Boeing 747 që dikur ishin sinonim i udhëtimeve ndërkontinentale janë kthyer kështu në një destinacion ku vizitorët mund të “hipin në avion” pa u shkëputur asnjëherë nga toka.
