Objektet shtetërore të ndërtuara, apo krijuara më shumë se 70 vjet më parë do të futen në proces verifikimi për të përcaktuar nëse kanë interes kulturor. Një udhëzim i ri i Ministrisë së Turizmit, Kulturës dhe Sportit përcakton kriteret që do të përdoren për evidentimin e pasurive të paluajtshme shtetërore që mund të marrin statusin e pasurisë kulturore.
Por, vjetërsia nuk do të jetë kriteri I vetëm. Në lista do të përfshihen edhe objektet që paraqesin indicie për vlera historike, artistike, arkitektonike, arkeologjike, apo etnografike, që evidentohen në dokumente historike e arkivore apo që jdodhen Brenda qendrave dhe ansambleve historike, peizazheve kulturore dhe zonave arkeologjike. Propozime për verifikim mund të bëhen edhe nga institucionet publike, pushteti vendor, komunitetet locale, apo organizatat e shoqërisë civile. Listat do të hartohen nga institucionet që administrojnë pronat, në bashkëpunim me drejtoritë rajonale të trashëgimisë kulturore. Për ccdo pasuri krijohet një kartelë e posaccme, ku do të pasqyrohen vendodhja, të dhënat kadastrale, historiku, karakteristikat arkitekturore, gjendja fizike, funksioni actual dhe dokumentacioni fotografik dhe hartografik.
Pjesë e vlerësimit do të jetë edhe niveli i rrezikut të secilit objekt. Udhëzimi parashikon evidentimin e rreziqeve nga tërmetet, përmbytjet, rrëshqitjet, zjarret, dëmtimet biologjike apo ndryshimet klimatike, ndërsa gjendja strukturore do të klasifikohet nga objekt i përdorshëm dhe pa rrezik, deri te ndërtesat plotësisht të shkatërruara.
Dokumentacioni do t’i dërgohet Institutit Kombëtar të Trashëgimisë Kulturore, i cili ka 15 ditë pune për të verifikuar nëse është i plotë. Pas përfundimit të procedurës dhe shpalljes së objektit si pasuri kulturore nga ministri përgjegjës, ai do të regjistrohet në Regjistrin Kombëtar të Pasurive Kulturore. Marrja e këtij statusi nuk ndryshon pronësinë apo institucionin që administron objektin, por sjell detyrimet dhe kufizimet që burojnë nga legjislacioni për trashëgiminë kulturore./Scan.tv
