Kryeministri Edi Rama është parë duke u larguar nga mbledhja me ministrat në Pogradec me një Mercedes-Benz S-Class të gjeneratës së fundit, një prej modeleve më luksoze dhe teknologjikisht më të avancuara të prodhuesit gjerman.
Automjeti i zi, me targë AC 753 ZN, nga elementet e jashtme dhe specifikat e modelit duket se përputhet me Mercedes-Benz S 350 d 4MATIC, versioni hyrës me motor nafte në gamën e re të S-Class.
Çmimi fillestar zyrtar i këtij modeli në Gjermani është 121,356.20 euro, përfshirë TVSH-në 19%, por pa llogaritur shpenzimet e dorëzimit.
View this post on Instagram
Kjo është vetëm vlera bazë. Pajisjet shtesë, personalizimet, paketat e sigurisë, taksat dhe kostot e importit mund ta rrisin ndjeshëm faturën përfundimtare të automjetit.
S 350 d 4MATIC pajiset me motor 3.0 litra me gjashtë cilindra, që prodhon 313 kuaj fuqi. Sistemi elektrik i integruar i shton përkohësisht edhe 23 kuaj të tjerë.
S-Class i rifreskuar konsiderohet një nga përditësimet më të mëdha të realizuara nga Mercedes-Benz brenda së njëjtës gjeneratë. Sipas kompanisë, rreth 2,700 komponentë, ose më shumë se gjysma e makinës, janë zhvilluar ose riinxhinieruar.
Modeli sjell një pjesë të përparme të ridizajnuar, grilë më të madhe dhe të ndriçuar, teknologjinë “Digital Light” dhe një arkitekturë të re elektronike të mbështetur te sistemi MB.OS.
Megjithatë, mbetet e paqartë se kujt i përket makina dhe si është vënë në dispozicion të kryeministrit. Deri tani nuk është publikuar ndonjë dokument që të tregojë nëse automjeti është blerë me fondet e buxhetit, është marrë me qira nga Kryeministria apo është pronë private.
Kryeministrisë i është kërkuar informacion për pronësinë e automjetit, mënyrën e sigurimit dhe kostot financiare të mundshme, por deri në publikimin e raportimit nuk ishte kthyer përgjigje.
Rama ka përdorur edhe më parë automjete të segmentit luksoz. Prej vitit 2022 ai lëvizte me një Mercedes-Benz S-Class të prodhuar në vitin 2017, me targë AA 753 ZN, vlera e të cilit përllogaritej në atë kohë rreth 111 mijë dollarë.
Më herët kryeministri përdorte një “GMC Yukon XL”, për të cilin Kryeministria deklaroi se ishte pronë e një subjekti privat dhe ishte marrë me qira nga Partia Socialiste. Para tij, Rama kishte përdorur edhe një “Lincoln”, që sipas deklarimeve të tij ia kishte sjellë i vëllai nga Shtetet e Bashkuara.
Përdorimi i një automjeti të sigurt dhe të përshtatshëm për protokollin e një kryeministri nuk përbën në vetvete shkelje. Por mungesa e të dhënave mbi pronësinë dhe faturën e makinës së re ngre nevojën për transparencë mbi mënyrën e financimit të saj.
