U deshën denoncime publike, një përgënjeshtrim nga drejtori i Startup Albania dhe disa javë pritje që lista zyrtare e përfituesve të Grantit 2026 të publikohej.
Lista përfundimtare ka disa ndryshime nga versioni paraprak i publikuar në fillim të gushtit. Disa emra të kontestuar janë hequr, ndërsa pas ankimeve janë shtuar fitues të rinj.
Por problemi kryesor mbetet: një pjesë e parave publike për startup-et po shkon sërish te persona që kanë përfituar edhe një vit më parë.
Krahasimi i listave të viteve 2025 dhe 2026 tregon se të paktën 15 persona janë shpallur fitues në të dyja vitet.
Disa kanë aplikuar me të njëjtin projekt. Të tjerë kanë ndryshuar pak emrin, ndërsa në disa raste projekti paraqitet me një emërtim krejt të ri, por NIPT-i i subjektit ka mbetur i njëjtë.
Pra, në letër ndryshon ideja, por fituesi mbetet i njëjtë.
Fituesit që përsëriten
- Aldi Lekaj
2025: ATA
2026: ECN Partners - Arben Oshafi
2025: B2Balkan. com
2026: B2balkan - Bora Selenica
2025: Pigi
2026: Pigi: Edukim Financiar për Fëmijët - Emil Andoni
2025: e-Health Albania
2026: eDoktor - Endri Burrja
2025 dhe 2026: MedWallet - Erion Çuni
2025 dhe 2026: Komuniteti - Fatjon Gjata
2025: Brisk Square
2026: Outerlynx - Genti Selenica
2025: Baboon atWork
2026: atWorkapp - Gregor Andoni
2025: GrAnD Industries
2026: GrAnD Creative Industries - Jona Shaba
2025 dhe 2026: VLEPA - Leonard Boduri
2025 dhe 2026: Autokorrektori i Gjuhës Shqipe - Meivis Struga
2025: EKOFUNGI Albania
2026: ESI Projects - Rio Sherri
2025: Axiom Breach
2026: Axiom Breach shpk - Rudina Hoxha
2025 dhe 2026: Local E-Draughts - Sokol Qeraxhiu
2025: Tetra Pro
2026: Tetra PRO
Sipas krahasimit të dokumenteve të bërë nga VNA, në shumë prej këtyre rasteve përputhet edhe NIPT-i, duke treguar se bëhet fjalë për të njëjtët individë ose subjekte.
Aldi Lekaj, për shembull, mori 6.5 milionë lekë në vitin 2025 për projektin “ATA”. Në vitin 2026 ai përfiton edhe 3.5 milionë lekë për “ECN Partners”.
Emil Andoni mori 3.2 milionë lekë për “e-Health Albania” dhe këtë vit përfiton 4.85 milionë lekë të tjera për “eDoktor”. Emri i projektit ka ndryshuar, por NIPT-i M42419022T është i njëjtë.
Raste të ngjashme janë edhe ato të Gregor Andonit dhe Meivis Strugës.
Ndërkohë, disa përfitues kanë fituar përsëri pa ndryshuar thuajse asgjë. Endri Burrja rikthehet me “MedWallet”, Erion Çuni me “Komuniteti”, Jona Shaba me “VLEPA”, Leonard Boduri me “Autokorrektorin e Gjuhës Shqipe”, Rudina Hoxha me “Local E-Draughts” dhe Sokol Qeraxhiu me “Tetra PRO”.
Përsëritja e emrave nuk provon vetvetiu se është shkelur ligji. Megjithatë, kur një fond për inovacionin financon të njëjtët persona dy vite radhazi, lind pyetja se sa mundësi reale kanë startup-et e reja për të përfituar.
Nga faza fillestare te financimi maksimal
Skema i ndan startup-et në tri faza:
- F1 për idetë fillestare, deri në 1.5 milionë lekë;
- F2 për validimin e idesë, deri në 4.5 milionë lekë;
- F3 për fazën e rritjes, deri në 9 milionë lekë.
Në vitin 2026, disa prej fituesve të përsëritur kanë kaluar në faza më të larta financimi. “Pigi”, “MedWallet” dhe “Komuniteti” janë ngjitur nga F2 në F3.
Më shumë pikëpyetje ngre projekti “VLEPA” i Jona Shabës, i cili ka kaluar drejtpërdrejt nga faza fillestare F1 në vitin 2025, në fazën F3 në vitin 2026.
Lista zyrtare nuk jep informacion për rezultatet e arritura nga këto projekte. Nuk shpjegohet se çfarë produktesh janë krijuar me financimin e parë, cilat objektiva janë përmbushur dhe mbi çfarë vlerësimi janë dhënë milionat e tjerë.
Çifti që mori rreth 240 mijë euro
Rasti që ngre më shumë dyshime lidhet me Genti Selenicën.
Në vitin 2025, ai mori 7.2 milionë lekë, rreth 79 mijë euro, për “Baboon atWork”. Në vitin 2026 përfiton edhe 6.25 milionë lekë, rreth 68 mijë euro, për “atWorkapp”.
Edhe bashkëshortja e tij, Xheni Maloku, është shpallur fituese. Ajo ka marrë 5.1 milionë lekë, rreth 55 mijë euro, për “Marigo Fashion Marketplace”, pasi kishte përfituar rreth 38 mijë euro edhe në vitin 2024.
Në total, çifti Selenica–Maloku ka përfituar rreth 240 mijë euro nga fondet publike.
Genti Selenica nuk ishte në listën paraprake të fituesve. Emri i tij u shtua vetëm pas procesit të ankimeve, duke kaluar nga i skualifikuar në përfitues të rreth 68 mijë eurove.
Institucionet nuk kanë bërë publike pikët që ai mori në vlerësimin e parë, pikët e shtuara pas ankimit dhe arsyet e ndryshimit të vendimit.
Kjo e bën të nevojshme transparencën e plotë për procesin.
Ministrja Delina Ibrahimaj dhe drejtuesi i Startup Albania, Arjan Ymeri, duhet të shpjegojnë përse fondet për inovacionin po përfundojnë dy vite radhazi te të njëjtët persona dhe mbi çfarë kriteresh janë marrë vendimet pas ankimeve.
