Një detaj luksi bie në sy në fotografinë e Ergys Agasit pas arrestimit: ora e bardhë që ai mban në dorën e majtë.
Nga forma karakteristike e kasës dhe rripi i bardhë me dy rreshta perforimesh, ora ngjan me modelin Richard Mille RM 055 Bubba Watson White Ceramic, një prej modeleve më të njohura të prodhuesit zviceran.
Ky model me kasë prej qeramike të bardhë tregtohet aktualisht për rreth 320–407 mijë dollarë, në varësi të vitit të prodhimit, gjendjes dhe dokumentacionit. E përkthyer në monedhën europiane, vlera e tij mund të arrijë afërsisht 280–350 mijë euro.
Në treg gjenden oferta për modele të përdorura pranë 320 mijë dollarëve, ndërsa ekzemplarët “full set”, me kutinë dhe dokumentet origjinale, si dhe versionet e kufizuara “White Legend”, kalojnë edhe kufirin e 400 mijë dollarëve.
Nëse ora e Agasit është origjinale dhe i përket pikërisht këtij modeli, vetëm aksesori që mbante në dorë gjatë arrestimit kushton sa një apartament apo një shtëpi.
Megjithatë, modeli dhe autenticiteti i orës nuk mund të përcaktohen përfundimisht vetëm nga fotografia. Për këtë nevojitet verifikimi i numrit të serisë, mekanizmit dhe dokumentacionit përkatës.
