Pasagjerët mund të mos e presin që një ditë e nxehtë dhe me diell gjatë verës të jetë arsyeja që fluturimi i tyre të vonohet apo edhe të anulohet. Por valët e të nxehtit mund të jenë të rrezikshme për fluturimet.
Temperaturat e larta ndikojnë në performancën e avionëve, duke shkaktuar vonesa në udhëtime, kufizime të peshës, ndalesa për furnizim me karburant dhe, në disa raste, edhe anulime.
“Një ditë e nxehtë vere mund të ndikojë në operimin e një avioni njësoj si bora ose akulli”, tha Cary Grant, profesor në Universitetin Aeronautik Embry-Riddle, i cili ka kaluar dekada duke fluturuar si pilot i United Airlines.
Arsyeja lidhet me shkencën e aerodinamikës.
Avionët kanë nevojë për ajër më të dendur që motorët dhe krahët të mund të krijojnë forcën ngritëse të nevojshme për t’u shkëputur nga toka.
Temperaturat e larta bëjnë që molekulat e ajrit të shpërndahen më larg nga njëra-tjetra, duke e bërë ajrin më pak të dendur ose më të hollë. Kur temperaturat bëhen shumë të larta, ngritja e avionit nga pista bëhet dukshëm më e vështirë.
“Motorët kanë nevojë që ajri të kalojë përmes tyre dhe më pas ta nxjerrin përsëri jashtë për të krijuar shtytje. Nëse ka më pak ajër që hyn nga pjesa e përparme, ka edhe më pak ajër që del nga pjesa e pasme”, shpjegoi Grant. “Krahët kanë nevojë që ajri të kalojë mbi ta. Nëse ka më pak ajër që kalon mbi krahë, krijohet më pak forcë ngritëse.”
Edhe pse fizika pas këtij procesi mund të duket e ndërlikuar, në thelb kompanitë ajrore kanë dy mundësi për të garantuar një nisje të sigurt: ose duhet të përdorin një pistë më të gjatë për të fituar më shumë shpejtësi, ose duhet të ulin peshën e avionit.
Por disa aeroporte nuk kanë hapësirën ose buxhetin e nevojshëm për të zgjatur pistat. Kjo i lë kompanitë ajrore me zgjidhjen tjetër të mundshme: të zvogëlojnë ngarkesën e avionit.
“Në disa raste, kompanitë ajrore mund ta ulin peshën e avionit për të garantuar një ngritje të sigurt, duke hequr ngarkesën ose duke kufizuar numrin e pasagjerëve. Gjithashtu, mund të ngarkojnë më pak karburant për të akomoduar të gjithë pasagjerët, por në këtë rast mund të jetë e nevojshme një ndalesë për furnizim me karburant për të arritur destinacionin e planifikuar”, tha Administrata Federale e Aviacionit (FAA) në një deklaratë për CNN.
Por ndonjëherë nxehtësia është aq e madhe sa fluturimi nuk është fare i mundur.
“Edhe pse ulja e peshës mund të jetë një mundësi, ndonjëherë temperaturat tejkalojnë temperaturat maksimale ndaj të cilave avioni është testuar. Kur ndodh kjo, manuali i operimit nuk përmban të dhëna që do të lejonin fluturimin e avionit”, tha FAA.
Jo vetëm performanca e avionit mund të ndikohet nga temperaturat ekstreme, por edhe ekuipazhi dhe pasagjerët.
“Kur mendojmë për nxehtësinë, ajo ndikon te motorët, ndikon te avioni, por ndikon edhe te njerëzit”, tha Grant. “Nëse mendoni se sa mirë performoni kur jeni në vapë, kuptoni se performanca juaj bie.”
Ekipet që punojnë në tokë në aeroporte me klimë të nxehtë mund të ekspozohen ndaj temperaturave shumë të larta dhe kompanitë ajrore duhet të marrin masa për të mbrojtur shëndetin e tyre.
“Ne kemi gjithashtu një plan gjithëpërfshirës për menaxhimin e nxehtësisë për punonjësit tanë, për t’u siguruar që ata të kenë hidratim të mjaftueshëm dhe vende ku mund të freskohen”, tha Southwest Airlines në një deklaratë për CNN.
Brenda kabinës, kompanitë ajrore përpiqen që ambienti të jetë sa më i rehatshëm për pasagjerët.
“Pikërisht për këtë arsye, stjuardesat dhe stjuardët ndonjëherë u kërkojnë pasagjerëve të mbyllin perdet e dritareve ndërsa avioni po afrohet te porta e aeroportit, në mënyrë që brendësia e avionit të mbahet sa më e freskët”, shtoi Southwest.
Sipas Administratës Kombëtare Oqeanike dhe Atmosferike (NOAA), korriku ishte muaji më i nxehtë i regjistruar ndonjëherë në SHBA-në kontinentale, që nga fillimi i regjistrimeve në vitin 1895.
