Turizmi vlerësohet si sektori me potencialin më të madh për krijimin e vendeve të reja të punës në Shqipëri, ndërsa diversifikimi i ofertës turistike shihet si një mundësi për të zgjatur sezonin dhe për të rritur punësimin gjatë gjithë vitit.
Gjetjet kryesore të anketës “FY 2026 Albania Country Opinion Survey Report”, të publikuara nga Banka Botërore, tregojnë se krahas turizmit, potencial të rëndësishëm për punësim dhe zhvillim ekonomik kanë edhe bujqësia dhe agro-përpunimi, teknologjia e informacionit dhe shërbimet digjitale, energjia e rinovueshme, infrastruktura e gjelbër, ndërtimi dhe industria e lehtë. Anketa përfshiu 219 përfaqësues të institucioneve, biznesit dhe shoqërisë civile.
Në sektorin e turizmit, zhvillimi i agroturizmit, turizmit kulturor, historik dhe të aventurës shihet si një mundësi për të zgjeruar aktivitetin përtej muajve të sezonit veror dhe për të krijuar vende të reja pune në zona të ndryshme të vendit.
Një potencial të rëndësishëm paraqet edhe bujqësia dhe agro-përpunimi. Rritja e aktiviteteve me vlerë të shtuar, përpunimi i produkteve bujqësore, zgjerimi i eksporteve, si dhe investimet në magazinim dhe paketim, mund të krijojnë mundësi të reja punësimi dhe të nxisin zhvillimin ekonomik, veçanërisht në zonat jashtë qendrave urbane.
Në të njëjtën kohë, teknologjia e informacionit dhe shërbimet digjitale konsiderohen sektorë me perspektivë të lartë për krijimin e vendeve të punës të kualifikuara dhe për zhvillimin e aktiviteteve të orientuara drejt eksporteve.
Sa i përket prioriteteve të zhvillimit, bujqësia dhe siguria ushqimore renditen në vend të parë, të përzgjedhura nga 49% e të anketuarve. Arsimi renditet i dyti me 47%, ndërsa shëndetësia është përzgjedhur nga 36% e pjesëmarrësve. Vendet e punës kanë marrë 34% të përgjigjeve, ndërsa infrastruktura digjitale 32%.
Në tërësi, rezultatet evidentojnë potencialin e ekonomisë shqiptare për të krijuar më shumë vende pune përmes zhvillimit të sektorëve me vlerë të shtuar, rritjes së investimeve, përshpejtimit të digjitalizimit dhe diversifikimit të ofertës turistike.
Krijimi i vendeve të reja të punës, forcimi i kapitalit njerëzor dhe sigurimi i një rritjeje të qëndrueshme janë gjithashtu ndër prioritetet kryesore të strategjisë së Bankës Botërore për mbështetjen e zhvillimit të Shqipërisë.
