AKSHI ka shpallur fituese të një tenderi me vlerë mbi 79 milionë lekë kompaninë RATECH shpk, ndonëse kjo kompani paraqiti ofertën më të shtrenjtë nga të gjithë pjesëmarrësit. Tenderi me numër reference REF-40965-03-12-2025 për llogari të Drejtorisë së Përgjithshme të Burgjeve ka si objekt mirëmbajtjen për 24 muaj të sallës së monitorimit të sigurisë, që përdoret për mbikëqyrjen e sistemit penitenciar në Shqipëri dhe është shpallur që në mars 2025.
Siç konstatohet nga dokumentet e konsultuara nga Skyweb.al, në garë morën pjesë pesë kompani, ndër të cilat tre ofruan çmime më të ulëta se RATECH:
- Advanced Business Solutions (ABS): 59.9 milionë lekë pa TVSH
- AES Communication: 65.8 milionë lekë pa TVSH
- RATECH shpk: 71.9 milionë lekë pa TVSH
- ALBASCAN shpk: 73.5 milionë lekë pa TVSH
- NAOL shpk: nuk dorëzoi asnjë dokumentacion
Por pavarësisht ofertave më të favorshme financiarisht, të gjitha kompanitë e tjera u skualifikuan për shkaqe formale dhe teknike.
Pse u skualifikuan konkurrentët?
- ABS, që kishte ofertën më të ulët, u përjashtua për mungesë certifikimesh teknike për punonjësit që do të mirëmbanin sistemet e sigurisë edhe pse përmbushte kriteret ligjore, financiare dhe të përvojës.
- AES Communication u përjashtua pasi nuk provoj një përvojë të ngjashme brenda tre viteve të fundit, çka e bënte të papërputhshme me kriteret e përcaktuara nga autoriteti kontraktor.
- NAOL shpk nuk dorëzoi fare dokumentacion në sistemin elektronik të prokurimeve dhe u skualifikua automatikisht.
Fituesja RATECH, e vetmja e kualifikuar
RATECH shpk, e vetmja që nuk u skualifikua nga ndonjë kriter skualifikues, mbeti ofertuesi i vetëm i vlefshëm dhe u shpall fitues me çmimin më të lartë ndër të gjithë.
Ky rast ngre sërish shqetësimin mbi mënyrën se si autoritetet publike përdorin kriteret teknike për të skualifikuar ofertat më të lira, duke i hapur rrugë kompanive me çmime më të larta.
Edhe pse në teori shpallet fituesi me “ofertën ekonomikisht më të favorshme bazuar në çmim”, në praktikë mbeten në lojë vetëm ata që kalojnë filtrat formalë dhe teknikë – shpesh të interpretuar në mënyrë të diskutueshme.
Në këtë rast konkret, buxheti i shtetit do të paguajë rreth 12 milionë lekë më shumë sesa oferta më e ulët, për një kontratë që do të zgjasë vetëm dy vjet.
Edhe tenderi 6.2 milionë euro për sistemet e sigurisë së Burgjeve, në “dyert e gjykatave”
Ky nuk është rasti i vetëm që ka ngritur dyshime mbi mënyrën e menaxhimit të kontratave publike në sistemin penitenciar. Paralelisht me këtë tender, një tjetër procedurë me fond limit 6.2 milionë euro për mirëmbajtjen e pajisjeve të sigurisë në burgje, i shpallur nga AKSHI, po shoqërohet nga ankesa dhe akuza për manipulim gare dhe paracaktim të fituesit.
Pas anulimit dhe rishpalljes së procedurës, kompania AESS në pronësi të Lefter Klemos i është drejtuar Komisionit të Prokurimit Publik duke pretenduar se kriteret e tenderit janë përpiluar në mënyrë të tillë që përjashtojnë çdo konkurrent tjetër përveç një bashkimi të caktuar operatorësh.
Ankesa përmend edhe mungesën e të dhënave teknike për sistemet ekzistuese dhe faktin që nuk është përdorur ndarja në lote, gjë që, sipas saj, kufizon konkurrencën reale dhe favorizon një rreth të vogël kompanish.
Tensioni rritet edhe më shumë nga konteksti problematik i sigurisë në burgje.
Pas vrasjes me armë në burgun e Peqinitnë dhjetor 2023 dhe tentativës për arratisje në Fier, të cilat ndodhën nën kontratat e kompanive të përfshira në tenderin aktual, besueshmëria e sistemit të kontrollit është vënë seriozisht në dyshim.
Drejtori i përgjithshëm i burgjeve në atë kohë, Admir Braja, dha dorëheqjen, por kompanitë që ishin përgjegjëse për mirëmbajtjen e sigurisë janë sërish në garë për kontrata miliona euro. /skyweb.al
