Administrata Tatimore ka publikuar një seri sqarimesh për fermerët dhe bizneset lidhur me përfitimin e kompensimit 10% për produktet bujqësore të shitura përmes autofaturave.
Sipas Tatimeve, për të përfituar nga skema, fermeri duhet të jetë i regjistruar në Drejtorinë Rajonale Tatimore dhe të jetë pajisur me NIPT dhe certifikatë.
Produktet duhet t’i shiten një subjekti të regjistruar për TVSH, i cili ushtron aktivitet si grumbullues ose përpunues i produkteve bujqësore, apo si agroturizëm i certifikuar. Kompensimi llogaritet mbi vlerën e furnizimit të paguar nga blerësi për llogari të fermerit.
Gjatë aplikimit online nuk kërkohet ngarkimi i autofaturave. Dokumente shtesë mund të kërkohen vetëm gjatë verifikimit nga Administrata Tatimore.
Për furnizimet e realizuara nga janari deri në qershor 2026, fermerët mund të aplikojnë nga 1 korriku deri më 31 dhjetor 2026. Për shitjet e kryera nga korriku deri në dhjetor, aplikimi hapet më 1 janar dhe mbyllet më 30 qershor 2027.
Tatimet sqarojnë se mosshfaqja e ndonjë fature në sistem nuk e heq automatikisht të drejtën e kompensimit. Librat e blerjeve kalojnë nga SelfCare në sistemin CATS pas datës 10 të çdo muaji, ndaj fermerët që kanë aplikuar më herët mund ta përsërisin procedurën.
Për fermerët që shesin produkte blegtorale, kompensimi përfitohet vetëm kur transaksioni dokumentohet me autofaturë. Nëse blerësi nuk e lëshon atë, Tatimet u kërkojnë fermerëve ta denoncojnë rastin përmes aplikacionit “Denonco Evazionin”.
Administrata paralajmëron gjithashtu se blerjet e produkteve bujqësore nga fermerët vendas duhet të deklarohen me TVSH 0%, si blerje të përjashtuara. Deklarimi me normën 6% mund të sjellë llogaritje të gabuar dhe refuzimin e kërkesës për kompensim.
Pagesa kalon drejtpërdrejt në llogarinë bankare të fermerit, sipas IBAN-it të deklaruar në formular. Nëse plotësohen kushtet ligjore dhe përfundojnë verifikimet, kompensimi duhet të paguhet brenda 30 ditëve nga paraqitja e kërkesës. /skyweb.al
