Një fluturim i American Airlines nga Dallas-Fort Worth drejt Newark u devijua në aeroportin e Baltimorës, pasi një pasagjer shfaqi sjellje të dhunshme dhe sulmoi personat përreth tij.
Ngjarja ndodhi më 3 shtator në fluturimin AA618. Sipas dëshmive të pasagjerëve, burri dukej në gjendje të dehur dhe nisi të bërtiste ndaj personit që ishte ulur pranë tij.
Kur një anëtar i ekuipazhit ndërhyri për ta qetësuar, ai përdori fyerje raciste dhe homofobike. Situata u përshkallëzua më pas në dhunë fizike.
Pasagjeri dyshohet se goditi personin pranë tij dhe kompjuterin që ai po përdorte. Ai shtyu gjithashtu një grua që ndërhyri për të ndihmuar.
Tre pasagjerë, të mbështetur nga ekuipazhi, arritën ta neutralizonin dhe ta lidhnin në sedilje duke përdorur shirit ngjitës dhe lidhëse plastike.
Avioni u ul në Baltimorë rreth 15 minuta më vonë, ku oficerët hynë në bord dhe morën në ndalim pasagjerin.
Ai u arrestua nga policia e transportit e Marylandit dhe përballet me akuza në nivel shtetëror. Ndërkohë, FBI po mbledh informacione për të përcaktuar nëse ndaj tij do të ngrihen edhe akuza federale.
American Airlines konfirmoi devijimin e fluturimit, falënderoi ekuipazhin për profesionalizmin dhe deklaroi se nuk toleron asnjë formë dhune në bordin e avionëve të saj.
