Kur avionët e rrëmbyer rrëzuan dy kullat binjake të World Trade Center më 11 shtator 2001, rreth 25,000 fëmijë jetonin ose ndiqnin shkollën aty pranë, në pjesën e poshtme të Manhatanit, ndërsa mijëra të tjerë ndodheshin në lagjet përreth. Disa ishin foshnja dhe fëmijë të vegjël, ndërsa të tjerë ende nuk kishin lindur dhe ndodheshin në barkun e nënave të tyre.
Edhe pse këta fëmijë u ekspozuan ndaj resë masive toksike dhe pluhurit që u përhap pas shembjes së kullave, i cili përmbante beton të pulverizuar, fibra qelqi, azbest dhe ndotës të tjerë, shumë pak prej tyre u përfshinë në studimet shëndetësore afatgjata të financuara nga qeveria për të mbijetuarit e sulmeve në World Trade Center. Këto studime u përqendruan kryesisht te punonjësit e emergjencave dhe të rriturit e tjerë, shkruan Reters.
Si rezultat, nuk ka pasur një mënyrë sistematike për të ndjekur sëmundjet kronike, përfshirë kanceret, sëmundjet kardiovaskulare dhe problemet që lidhen me shëndetin riprodhues, të cilat mund të shfaqen vetëm tani, ndërsa këta fëmijë po arrijnë moshën 30 dhe 40 vjeç, thonë shkencëtarët.
Mbeten ende pyetje të rëndësishme nëse ekspozimi ndaj toksinave dhe trauma e përjetuar më 11 shtator dhe pas tij kanë rritur rrezikun e problemeve shëndetësore afatgjata te këta persona, sipas shkencëtarëve.
Për të adresuar këto boshllëqe, Kongresi njoftoi në vitin 2022 se do të financonte një studim të këtyre individëve, i cili do të zhvillohej nën mbikëqyrjen e Qendrave Amerikane për Kontrollin dhe Parandalimin e Sëmundjeve (CDC).
Muajin e kaluar, CDC njoftoi se do të pranonte aplikime nga studiues për të ngritur Qendrën Koordinuese të Kërkimeve për të Rinjtë e World Trade Center dhe për të identifikuar e ndjekur një grup kërkimor të të rinjve, të njohur si “Youth Research Cohort”.
Agjencia ka përcaktuar se pjesëmarrësit në studim duhet të kenë qenë 21 vjeç ose më të rinj, ose të kenë qenë ende në barkun e nënës, dhe të kenë jetuar në zonën poshtë Rrugës 14 në Manhattan ose kudo në Brooklyn, më 11 shtator 2001 ose pas kësaj date.
Për krahasim, do të rekrutohen edhe persona të së njëjtës grupmoshë, por që nuk kanë qenë të ekspozuar ndaj këtyre faktorëve.
Nuk është e qartë se sa pjesëmarrës shpreson të rekrutojë CDC-ja, por një zëdhënës i agjencisë tha se pritet të shpenzohen deri në 50 milionë dollarë në total për programin. Data e parashikuar e fillimit të projektit është 1 korrik 2027, tha zëdhënësi.
Anëtarët e publikut mund të regjistrohen online për të marrë përditësime dhe për t’u njoftuar kur të hapet regjistrimi për personat që plotësojnë kushtet për të marrë pjesë.
Programi Shëndetësor i World Trade Center i CDC-së dhe Regjistri Shëndetësor i World Trade Center i Departamentit të Shëndetësisë së qytetit të Nju Jorkut ofruan shërbime për fëmijët gjatë viteve të para pas sulmeve. Megjithatë, shumica e fëmijëve të prekur morën kujdes shëndetësor nga pediatrit e tyre, ndërsa shumë prej të rriturve të mbijetuar nuk kishin sigurim shëndetësor dhe kishin nevojë për shërbimet e këtyre programeve, kujton Dr. Joan Reibman, specialiste e sëmundjeve të mushkërive në NYU Langone Medical Center. /skyweb.al
