Në muajin qershor 2025, Aeroporti Ndërkombëtar i Tiranës ka regjistruar një tjetër rekord historik: mbi 1.14 milionë pasagjerë udhëtuan nga dhe drejt Shqipërisë, duke shënuar një rritje prej 8% krahasuar me të njëjtin muaj të një viti më parë. Kjo shifër konfirmon ritmin e lartë të rritjes së turizmit dhe udhëtimeve ajrore, duke e konsoliduar Rinasin si një nga nyjet më të rëndësishme ajrore në rajon.
Londra vijon të jetë destinacioni më i frekuentuar, me afro 89 mijë pasagjerë, ndërsa Bergamo dhe Roma mbeten gjithashtu ndër tre kryesoret, megjithëse me një rënie të lehtë në krahasim me vitin 2024.
Ndërkohë, disa destinacione kanë shënuar rritje të ndjeshme. Stuttgart ka trefishuar numrin e pasagjerëve, Perugia ka një rritje prej 158%, ndërsa Pescara dhe Nuremberg kanë kaluar mbi 100% rritje.
Kjo dëshmon për një orientim të linjave ajrore drejt qyteteve të mesme evropiane, ku ka komunitete të konsoliduara shqiptare.
Por jo gjithçka është në rritje. Bukureshti ka pësuar një rënie të thellë prej 74%, ndërsa Catania, një ndër destinacionet tradicionale për emigrantët shqiptarë në Itali, ka shënuar një ulje me 52%.
Në mënyrë të befasishme, fluturimet drejt Brindisit, Bristolit dhe Jeddah janë zhdukur plotësisht nga rrjeti i fluturimeve gjatë muajit qershor, duke sinjalizuar ristrukturime të linjave ajrore ose mungesë interesi nga operatorët.
Megjithatë, me sezonin turistik në kulm dhe me një pranverë e verë të mbushur me destinacione të reja, pritet që muaji korrik të tejkalojë edhe rekordin e sapo vendosur, duke e çuar Rinasin drejt një viti tjetër historik në fluksin e udhëtimeve./skyweb.al
