Qeveria ka vendosur të centralizojë thuajse tërësisht procesin e dhënies së lejeve të ndërtimit në të gjithë vendin, duke ia hequr këtë kompetencë bashkive për çdo objekt mbi 6 kate.
Vendimi i fundit i Këshillit të Ministrave, përmes një ndryshimi në rregulloren e zhvillimit të territorit, zhbën edhe juridikisht autonominë vendore në këtë fushë, duke ia kaluar të gjitha autorizimet e rëndësishme ndërtimore Këshillit Kombëtar të Territorit dhe Ujit, që drejtohet nga vetë kryeministri Edi Rama.
Ky model ishte aplikuar de facto në Tiranë për gati dy vite radhazi, kur lejet e ndërtimeve mbi 1000 metra katrorë kalonin vetëm përmes KKT-së.
Sipas rregullores së mëparshme, njësitë e pushtetit vendor kishin të drejtë të jepnin leje për ndërtime deri në 14 kate.
Por me ndryshimet e reja, ato mund të miratojnë vetëm objekte individuale deri në 6 kate, duke e kufizuar funksionin e tyre vetëm në ndërtime banimi të vogla.
“Për çdo objekt mbi 6 kate, apo kur zhvillimi shtrihet brenda brezit bregdetar, leja duhet të miratohet nga Këshilli Kombëtar i Territorit dhe Ujit,” thuhet në vendimin e qeverisë.
Për më tepër, rregullorja e re prek edhe aplikimet që janë në proces.
Edhe në rastet kur bashkia ka pranuar aplikimin dhe është paguar tarifa, procedura mund të përfundohet vetëm pas marrjes së konformitetit nga Sekretariati Teknik i KKTU-së.
Ky vendim konsiderohet si një tjetër hap drejt përqendrimit të pushtetit në nivel qendror dhe dobësimit të autoritetit të bashkive, veçanërisht në qytetet e mëdha ku interesat ndërtimore janë më të ndjeshme dhe më fitimprurëse./skyweb.al
