Kostoja e jetesës në Itali po rritet me shpejtësi, ndërsa fuqia blerëse e qytetarëve vijon të dobësohet.
Sipas të dhënave të publikuara nga ISTAT, inflacioni arriti në 3.3% gjatë gushtit 2026, nga 2.9% që ishte një muaj më parë. Krahasuar me korrikun, çmimet u rritën me 0.5%.
Rritja është nxitur kryesisht nga energjia. Çmimet e energjisë së rregulluar u rritën me 18.6%, ndërsa ato të energjisë së parregulluar me 17%.
Edhe produktet ushqimore të papërpunuara u shtrenjtuan me 3.8%, ndërsa çmimet e produkteve që blihen më shpesh nga familjet u rritën me 4.3%.
Ndërkohë, blerja e një banese kushton rreth 4% më shumë se një vit më parë, duke e bërë gjithnjë e më të vështirë sigurimin e një shtëpie, veçanërisht për të rinjtë.
Situata bëhet edhe më e rëndë për shkak të stagnimit të pagave. Një analizë e Zyrës Parlamentare të Buxhetit tregon se pagat reale të punonjësve të sektorit privat janë 6.6% më të ulëta krahasuar me fillimin e viteve 1990.
Sipas Unionit Kombëtar të Konsumatorëve, shpenzimet për banesën, energjinë elektrike dhe gazin janë rritur me 9.1% brenda një viti.
Kjo përkthehet në një faturë shtesë vjetore prej 365 eurosh për një familje mesatare dhe 394 eurosh për një çift me dy fëmijë.
Transporti është shtrenjtuar gjithashtu me 6.1%. Në total, rritja e kostos së jetesës llogaritet në 882 euro në vit për një familje tipike dhe në 1,199 euro për një çift me dy fëmijë.
Shoqatat e konsumatorëve paralajmërojnë se, pa ndërhyrje mbi karburantet, energjinë dhe taksat, rritja e çmimeve mund të kthehet në një goditje të rëndë edhe për shtresën e mesme italiane. /skyweb.al
