Shlyerja e plotë e kredisë nuk mjafton që hipoteka të fshihet vetvetiu nga dokumentet e pronës.
Ekspertët paralajmërojnë se barra mund të vijojë të figurojë në kartelën e pasurisë, edhe pasi detyrimi ndaj bankës ose kreditorit është mbyllur.
Gabimi që bëjnë shumë pronarë është se mendojnë se përfundimi i kredisë sjell automatikisht edhe heqjen e hipotekës nga regjistri. Në të vërtetë, pronari duhet të ndjekë një procedurë të veçantë për fshirjen e barrës dhe përditësimin e kartelës së pasurisë.
Aplikimi kryhet online në portalin e-Albania, përmes shërbimit “Aplikim për fshirjen e hipotekës kontraktore, gjyqësore apo ligjore”.
Dokumenti kryesor që duhet paraqitur është akti noterial për fshirjen e hipotekës.
Kur kërkesa bëhet nga një person tjetër në emër të pronarit, nevojitet edhe prokurë ose akt përfaqësimi. Pas përfundimit të procedurës, qytetari duhet të pajiset me kartelën e përditësuar të pronës.
Pa këtë hap, hipoteka mund të mbetet aktive në regjistrat zyrtarë, megjithëse kredia është paguar plotësisht.
Kjo mund të krijojë pengesa në shitjen, dhurimin, përdorimin si garanci apo në veprime të tjera juridike mbi pasurinë. /skyweb.al
