Ballkani po tërheq gjithnjë e më shumë turistë falë natyrës së larmishme, qyteteve interesante, kulturave të ndryshme dhe kostove më të përballueshme. Rajoni ofron male, liqene, ujëvara dhe plazhe të bukura, ndërsa në shumë zona ende mungojnë resortet e mëdha dhe turmat e turistëve.
Sipas autorit të shkrimit në “CN Traveller”, Ballkani është një pikë ku ndërthuren ndikime të Evropës Perëndimore dhe Lindore, të dukshme në arkitekturë, ushqim, kulturë dhe fe.
Një tjetër arsye që po e bën rajonin më tërheqës lidhet me sistemin e ri evropian EES, i cili ka sjellë pritje në disa kufij dhe aeroporte të zonës Shengen. Për këtë arsye, turistët po shohin me më shumë interes vende jashtë Shengenit, si Shqipëria, Kosova, Serbia, Bosnjë-Hercegovina, Mali i Zi dhe Maqedonia e Veriut.
Natyra është një nga pikat më të forta të Ballkanit. Rajoni ofron mundësi për ecje, sporte ujore dhe pushime në ambiente të qeta. Një prej itinerareve më të njohura është “Majat e Ballkanit”, një shteg rreth 200 kilometra që kalon nëpër Shqipëri, Kosovë dhe Mal të Zi. Krahas turizmit malor, po zhvillohen edhe ekoturizmi, qendrat spa dhe pushimet e mirëqenies.
Edhe qytetet po fitojnë vëmendje. Prishtina tërheq vizitorë me arkitekturën dhe muralet e saj, ndërsa Biblioteka Kombëtare e Kosovës mbetet një nga ndërtesat më karakteristike. Shkupi njihet për arkitekturën moderne, ndërsa Durrësi për kombinimin e qytetit me plazhet shqiptare.
Shqipëria zë një vend të rëndësishëm në këtë panoramë. Gjiri i Gjipesë dhe Plazhi i Pasqyrave ofrojnë natyrë dhe ujëra të pastra, ndërsa struktura si “Zoe Hora” në Dhërmi tregojnë një qasje më moderne dhe të kujdesshme ndaj turizmit.
Në Tiranë, një nga atraksionet që rekomandohet është Piramida, e restauruar dhe e kthyer në qendër kulturore. Ndërkohë, zhvillimi i hapësirave për këmbësorë dhe projekteve të artit urban po i japin kryeqytetit një pamje të re.
Me kombinimin e natyrës, kulturës, plazheve dhe çmimeve relativisht të përballueshme, Ballkani po shndërrohet në një nga rajonet që po tërheqin më shumë vëmendje nga turistët evropianë.
