Paratë, telefonin apo ilaçet mos i lini në valixhen që dorëzoni në sportelin e fluturimit. Aeroporti Ndërkombëtar i Tiranës u këshillon pasagjerëve t’i mbajnë sendet me vlerë dhe ato të domosdoshme në bagazhin e dorës.
Në njoftimin për udhëtarët përmenden paratë dhe dokumentet me vlerë, laptopët, telefonat, kamerat, bizhuteritë, veprat e artit dhe medikamentet. Këshilla vlen për sendet që lejohen të transportohen në kabinë sipas rregullave të kompanisë ajrore dhe kontrollit të sigurisë.
View this post on Instagram
Sipas aeroportit, nëse bagazhi i regjistruar humbet ose dëmtohet, sendet me vlerë të padeklaruara mund të jenë të vështira për t’u gjurmuar ose verifikuar. Përpara nisjes, pasagjerët këshillohen të kontrollojnë kushtet e kompanisë me të cilën fluturojnë dhe t’i deklarojnë këto sende kur kërkohet.
Kujdes i veçantë nevojitet për ilaçet dhe lëngjet, për të cilat vlejnë rregulla specifike në kontrollin e sigurisë. Edhe përmasat dhe pesha e bagazhit të dorës ndryshojnë sipas kompanisë ajrore. /skyweb.al
