Tenderi me vlerë 1.6 milionë euro për uniformat e “Illyrian Guard” mund të jetë një ndër më të kontestuarit në historinë e prokurimeve publike në Shqipëri. Në fund, procedura u anulua, siç mëson skyweb.al duke nxjerrë në pah pamundësinë e institucionit për ta përfunduar, por edhe një betejë të mbushur me dyshime për dokumentet, oferta nën kosto dhe kleçka mes kompanive që nisën të sulmonin njëra-tjetrën për “plaçkën” prej 1.6 milionë eurosh.
Procedura u shpall në qershor 2025 dhe u zhvillua më 29 gusht, por përfundoi në një kalvar 15-mujor ankesash, skualifikimesh dhe rikualifikimesh, raporton skyweb.al.
Problemet nisën që te dokumentet e tenderit. “Toni Oil” denoncoi mungesë specifikimesh për disa artikuj, mospërputhje mes versionit shqip dhe atij anglisht dhe kritere që, sipas kompanisë, kufizonin konkurrencën.
Më pas u skualifikuan “Arisa-Konfeksion” dhe bashkimi “Malbertex” e “Univers Promotions”. Të dyja palët u ankuan dhe vendimet e KPP-së i rikthyen ofertat në rivlerësim.
Në këtë moment nisi edhe lufta mes konkurrentëve. “Vojsava Zenelaj” kundërshtoi kualifikimin e rivalëve dhe kërkoi verifikimin e autorizimeve, certifikatave dhe raporteve laboratorike.
Për “Arisa-Konfeksion”, pikëpyetjet u përqendruan te raportet e testimit që laboratori turk AZOLAB nuk i konfirmoi, pavarësisht kërkesave të “Illyrian Guard”. Kompania u skualifikua sërish, ndërsa mungesa e përgjigjes nga laboratori u përdor si bazë për dyshime mbi autenticitetin e dokumenteve.
Oferta e “Malbertex” dhe “Univers Promotions” u cilësua anomalisht e ulët. Sipas vlerësimit, kompanitë nuk paraqitën kontrata furnizimi, fatura, dokumente doganore apo prova transporti që të shpjegonin çmimet, ndërsa një artikull rezultonte i ofertuar nën vetë koston e blerjes.
Pas një tjetër vendimi të KPP-së, oferta u rivlerësua dhe u skualifikua përsëri. Kompanitë reaguan me ankesa të reja, kërkuan pezullimin e tenderit, anulimin e njoftimit të operatorëve të suksesshëm dhe masa ndaj personave përgjegjës.
Pas 15 muajsh përplasje, “Illyrian Guard” vendosi të anulonte të gjithë procedurën. Por edhe ky vendim përfundoi në KPP, pasi “Vojsava Zenelaj” kërkoi shfuqizimin e anulimit dhe shqyrtimin deri në fund të dokumenteve të rivalëve.
Dokumentet e publikuara nuk japin një arsye të plotë se përse tenderi u anulua dhe as një përgjigje përfundimtare për vlefshmërinë e ofertave.
Në këtë mënyrë, 1.6 milionë eurot nuk i “gëzoi” askush, të paktën për momentin, ndërsa përgjegjësia për kriteret e paqarta, rivlerësimet e pafundme dhe dështimin e procedurës mbetet pa një autor dhe punonjësit i “Ilyrian Guard” pa uniforma. /skyweb.al
