Një përplasje e fortë institucionale po ndodh mes Komisionit të Prokurimit Publik dhe drejtuesve të Komisionit Qendror të Zgjedhjeve në lidhje me një ndër tenderët më të diskutuar sëfundmi pas skandalit AKSHI, i cili u zbërthye nga SPAK, ndërkohë që hetimet ende vijojnë.
Ironia qendron në faktin edhe në këtë përplasje mes palëve qendron pikërisht një ndër aktorët e skandalit AKSHI, pikërisht Gëzim Hoxha.
Megjithatë, në rastin konkret ka raportime se në fakt në background të përplasjes për këtë tender qendrojnë familjarë të drejtuesve të lartë të KQZ.
Në thelb të konfliktit qëndron mënyra se si është shpallur fituesi i tenderit rreth 500 mijë euro për mirëmbajtjen e sistemeve të KQZ-së dhe përpjekja e këtij institucioni për ta mbajtur në fuqi një rezultat që është vënë në pikëpyetje nga KPP.
Procesi nisi si një tender rutinë, por shumë shpejt u kthye në një rast tipik përplasjeje mes autoritetit kontraktor dhe KPP-së duke ngjallur dyshime se një skandal më i madh fshihet në sfond, teksa rezulton se Sekretarja e Përgjithshme e KQZ-së ka hyrë fshehurazi sipas KPP në sistem dhe ka bërë vlerësime me pikë duke shpallur fitues pikërisht Gëzim Hoxhën.
Tenderi
Fillimisht, KQZ skualifikoi dy operatorë në garë dhe la në lojë vetëm bashkimin “INTELISOFT & WOW Digital”, i cili u shpall fitues paraprak, ndonëse kishte ofertën më të lartë. Kjo situatë u kontestua menjëherë nga kompanitë e përjashtuara si Instant.al dhe Evolve, duke çuar çështjen në KPP.
Komisioni i Prokurimit Publik ndërhyri dhe i dha të drejtë ankimuesve, duke urdhëruar rikthimin e tyre në garë dhe rivlerësimin e ofertave. Megjithatë, edhe pas këtij ndërhyrjeje, rezultati mbeti i njëjtë.
KQZ, pas rivlerësimit, shpalli sërish fitues të njëjtin subjekt, pra Gëzim Hoxhën duke e renditur të parin në bazë të një sistemi pikëzimi ku, përveç çmimit, pesha e madhe i jepet elementëve teknikë.
Kjo çoi në një ankim të dytë nga kompanitë e skualifikuara, kësaj here jo për skualifikim, por për mënyrën si ishte bërë pikëzimi dhe si ishte gjeneruar klasifikimi përfundimtar nga sistemi elektronik i prokurimeve.
KPP i dha sërish të drejtë ankimuesit dhe me vendimin nr. 227/2026 rrëzoi klasifikimin final, duke kërkuar rivlerësim të procedurës.
Por ndryshe nga praktika e nisur sidomos pas skandalit AKSHI, ku autoriteti publik i bindej Gjykatës së Tenderëve, pra KPP-së, KQZ nuk e pranoi këtë vendim dhe kërkoi rishikimin e tij, duke argumentuar se sistemi elektronik kishte funksionuar korrekt, se pikët ishin llogaritur automatikisht dhe se nuk kishte gabime në renditje.
Sipas këtij qëndrimi, çdo ndryshim në rezultat lidhej me formulat e sistemit dhe jo me ndërhyrje njerëzore, siç KPP tha se ishte ndërhyrë në mënyrë të pautorizuar nga Jona Josifi.
Megjithatë, në vendimin e shpallur sëfundmi, konsultuar edhe nga skyweb.al, duket se KPP nuk u bind nga këto argumente dhe me vendimin nr. 578/2026 e refuzoi kërkesën e KQZ-së, duke lënë në fuqi vendimin e mëparshëm dhe duke e detyruar institucionin të vijojë me rivlerësimin.
Kjo do të thotë se tenderi nuk mund të mbyllet në formën aktuale dhe se fituesi i shpallur nuk është i konsoliduar.
Praktikisht, procedura mbetet e bllokuar derisa të kryhet një rivlerësim që përputhet me kërkesat e KPP.
KPP: Sekretarja e KQZ u fut fshehurazi në sistem dhe nxorri fitues Gëzim Hoxhën
Në sfond të gjithë kësaj historie qëndron një element që e rëndon më tej situatën. Bëhet fjalë për ndërhyrjen në sistemin e prokurimeve nga një përdorues që nuk ishte pjesë e Komisionit të Vlerësimit të Ofertave, i identifikuar si Jona K. Josifi.
Jona Josifi është Sekretare e Përgjithshme e komanduar në KQZ. Sipas të dhënave të bëra publike më herët nga Skyweb.al, bazuar në deklarimet e KPP, ky përdorues rezulton me veprime konkrete në sistem gjatë fazës së rivlerësimit, çka ka ngritur dyshime për ndikim në pikëzimin e ofertave.
Nga ana tjetër, vetë KQZ në dokumentet zyrtare ka dhënë një interpretim më të kufizuar të rolit të saj, duke theksuar se nuk ka pasur ndërhyrje vendimtare dhe se sistemi elektronik gjeneron automatikisht klasifikimin final.
Ky kontrast mes konstatimeve dhe shpjegimeve zyrtare është një nga arsyet kryesore pse KPP nuk ka pranuar të mbyllë çështjen dhe ka kërkuar rivlerësim.
“INTELISOFT” lidhet me biznesmenin Gëzim Hoxha, një emër i njohur në sektorin e teknologjisë dhe i përmendur si aktor i skandalit AKSHI./skyweb.al
