Një avion pasagjerësh i kompanisë Flydubai, që po fluturonte nga Dubai drejt Tel Avivit, shkaktoi alarm të martën, 30 shtator, pasi gjatë fluturimit transmetoi për pak kohë një kod emergjence që lidhet me një rrëmbim të mundshëm.
Pas sinjalit, dy avionë luftarakë të Forcave Ajrore izraelite u ngritën me urgjencë për të verifikuar situatën. Avioni i pasagjerëve u devijua më pas drejt Arabisë Saudite, ku u ul në aeroportin e Tabukut.
Fillimisht, autoritetet izraelite u shqetësuan për mundësinë e një rrëmbimi, veçanërisht pasi për një periudhë të shkurtër nuk po arrinin të kontaktonin me pilotin. Megjithatë, zyra e kryeministrit izraelit Benjamin Netanyahu përjashtoi mundësinë e një rrëmbimi dhe bëri të ditur se incidenti nuk përbënte një kërcënim të jashtëm për sigurinë e avionit.
Sipas raportimeve të mediave izraelite, incidenti dyshohet se ka nisur pas një konflikti mes dy pilotëve në kabinën e avionit. Burime të sigurisë kanë deklaruar se dy pilotët janë përfshirë në një përleshje fizike gjatë fluturimit.
Sipas një raportimi të televizionit Channel 12, përplasja mes tyre ka vijuar derisa njëri prej pilotëve ka humbur ndjenjat. Sipas të njëjtave raportime, ngjarja nuk ishte e lidhur me një sulm apo kërcënim të jashtëm.
Në bordin e avionit ndodheshin pasagjerë, mes tyre edhe fëmijë. Avioni ishte nisur nga Dubai rreth orës 07:05 dhe pritej të mbërrinte në aeroportin Ben Gurion në Tel Aviv rreth orës 09:30.
Alarmi u aktivizua rreth orës 08:30, ndërsa avioni ishte në fazën e zbritjes dhe po kryente një kthesë. Pas situatës së krijuar, ekuipazhi ndryshoi kursin dhe avioni u drejtua drejt Arabisë Saudite, duke ulur lartësinë e fluturimit.
Dy avionët luftarakë izraelitë u ngritën në ajër për të kontrolluar situatën dhe për të verifikuar nëse avioni përbënte ndonjë kërcënim. Pas uljes së sigurt në Tabuk, autoritetet izraelite përjashtuan mundësinë e një rrëmbimi.
Pas incidentit, shefi i Shtabit të Përgjithshëm të ushtrisë izraelite, gjenerallejtënant Eyal Zamir, zhvilloi një mbledhje me zyrtarë të lartë ushtarakë për të vlerësuar situatën.
Në takim morën pjesë edhe kreu i Forcave Ajrore Izraelite, gjeneralmajor Omer Tischler, kreu i Drejtorisë së Operacioneve, gjeneralmajor Itzik Cohen, si dhe kreu i Drejtorisë së Inteligjencës, gjeneralmajor Shlomi Binder.
Autoritetet pritet të hetojnë më tej rrethanat e incidentit dhe të sqarojnë se çfarë ndodhi në kabinën e pilotimit dhe si u transmetuan sinjalet e emergjencës gjatë fluturimit.
