Disa ditë më parë, Skyweb.al raportoi për ndryshimet ligjore që parashikojnë përfundimin nga shteti të ndërtimeve të konfiskuara dhe dorëzimin e apartamenteve te qytetarët që kanë lidhur kontrata me ndërtuesit. Tashmë, projektligji është prezantuar në Kuvend, ku janë shpjeguar procedurat për verifikimin e blerësve dhe financimin e punimeve.
Gjatë diskutimit në Komisionin për Shëndetësinë dhe Mirëqenien Sociale, kryeadministratorja e Agjencisë së Administrimit të Pasurive të Sekuestruara dhe të Konfiskuara, Risena Xhaja, tha se ligji nr. 66/2023 parashikon konfiskimin, por nuk përcakton përfundimin e objekteve. Ndryshimet synojnë të zgjidhin situatën e qytetarëve që kanë paguar për prona në ndërtime të mbetura përgjysmë.
“Ajo që merr përsipër draftligji që ne propozojmë është të përfundojmë të gjitha objektet që janë lënë të papërfunduara nga ndërtuesit dhe t’ua japim pasuritë e përfunduara subjekteve që kanë pasur kontrata sipërmarrjeje, premtim-shitjeje”, deklaroi Xhaja.
Për të përcaktuar përfituesit, do të ngrihet një grup pune që do të kontrollojë kontratat e lidhura përpara noterit me ndërtuesit apo zhvilluesit. Verifikimi do të përfshijë personat që pretendojnë të drejta mbi apartamentet dhe njësitë e tjera përmes kontratave të porosisë, sipërmarrjes apo premtim-shitjes.
AAPSK-ja do të vlerësojë gjendjen fizike të ndërtimeve, investimet e kryera dhe punimet e mbetura. Më pas do të vijojnë procedurat e prokurimit për projektimin dhe përfundimin e tyre. Sipas Xhajës, të ardhurat nga shitja e pasurive të konfiskuara do të përdoren për financimin e këtyre ndërhyrjeve.
Aktualisht, 16 objekte i nënshtrohen procedurës së parablerjes. Bëhet fjalë kryesisht për shkelje të lejeve, përfshirë tejkalime të volumeve dhe shtesa. Sipas ndryshimeve të propozuara, parablerja do të lejohet vetëm për subjektet që kanë tejkaluar lejen, ndërsa ndërtimet tërësisht pa leje përjashtohen.
Projektligji zgjeron edhe përdorimin e pasurive të konfiskuara për strehim social dhe shoqërinë civile. Për nevojat e strehimit, Ministria e Ekonomisë do të paraqesë kërkesat, AAPSK-ja do të identifikojë pronat e përshtatshme dhe kalimi i tyre do të bëhet me vendim të Këshillit të Ministrave. Banesat duhet të jenë të përfunduara dhe të plotësojnë standardet për banim.
Investitorët përjashtohen nga përfitimi i pasurive të konfiskuara. Xhaja sqaroi gjithashtu se projektligji nuk trajton legalizimet: subjektet do të vetëdeklarojnë statusin e tyre, ndërsa rastet jashtë kushteve dhe afateve të legjislacionit përkatës do t’u nënshtrohen procedurave të konfiskimit.
