Komisionet parlamentare miratuan të hënën, vetëm me votat e mazhorancës, një nismë ligjore të mbështetur nga qeveria që parashikon transferimin e tenderave të Agjencia Kombëtare e Shoqërisë së Informacionit (AKSHI) te një shoqëri aksionere TIK me kapital publik e privat, ku shteti do të zotërojë të paktën 51% të aksioneve.
Sipas projektligjit të depozituar nga deputeti socialist Erjon Malaj, AKSHI nuk do të kryejë më prokurime dhe lidhje kontratash për mirëmbajtjen e platformave digjitale shtetërore, por do të ruajë funksione standardizuese, arkitekturore dhe monitoruese. Operimi, mirëmbajtja dhe zhvillimi i sistemeve do t’i kalojnë shoqërisë operatore TIK, ndërsa institucionet publike do të paguajnë përmes kontratave të shërbimit.
Opozita e kundërshtoi nismën, duke e lidhur me hetimet e Prokuroria e Posaçme për një grup të strukturuar kriminal në krye të AKSHI-t, ku të pandehur janë biznesmeni Ergys Agasi, drejtoresha Mirlinda Karçanaj dhe të tjerë.
Deputetja e PD-së Jorida Tabaku kërkoi audit të thelluar para ndryshimeve:
“Nëse një institucion është nën akuzë për shpërdorim dhe lidhje kriminale, përse nuk kryhet më parë një audit i thelluar financiar, teknik dhe i sigurisë?”
Ajo paralajmëroi se kalimi i infrastrukturës kritike në menaxhim privat “përbën një precedent të rrezikshëm” dhe mund të bie ndesh me standardet e BE-së.
Edhe në Komisionin për Çështjet e Brendshme pati shqetësime për sigurinë kombëtare. Deputeti i partisë Mundësia Erald Kapri pyeti:
“Ka shumë pikëpyetje të mëdha që ka të bëjë me Sigurinë Kombëtare, sepse hetimet treguan se persona të lidhur me krimin e organizuar kanë akses në të dhënat sensitive apo aplikimi i këtij modeli sjell më pak telashe?”
Ai kërkoi gjithashtu sqarime për mënyrën e përzgjedhjes së partnerit privat.
Shqetësime ngriti edhe deputeti socialist Ilir Pendavinji, i cili pyeti nëse modeli cenon rolin e AKSHI-t dhe si do të garantohet transparenca financiare.
Malaj argumentoi se ndryshimi vjen si nevojë e zhvillimit teknologjik:
“Ka ndarje funksionesh, shoqëria ka operimin, mirëmbajtjen dhe zhvillimin,” tha ai, duke shtuar se pronësia e sistemeve mbetet publike dhe se hetimet penale lidhen me përgjegjësi individuale.
Nisma vjen në një kohë kur mazhoranca po aplikon modele të ngjashme me shoqëri aksionere në sektorë të ndjeshëm, ndërsa hetimet për tenderat e AKSHI-t kanë nxjerrë në pah norma të larta fitimi për subjektet përfituese. Karçanaj akuzohet për “shkelje të barazisë në tenderë” në kuadër të një grupi kriminal, bashkë me Agasin dhe persona të tjerë.
