Shqipëria ndodhet prej disa ditësh në një valë protestash të dhunshme, me dhjetëra protestues dhe policë të lënduar, institucione publike të dëmtuara dhe biznese të djegura, përfshirë filiale bankash dhe kompani telekomunikacioni.
Megjithatë, në tregun valutor duket sikur nuk po ndodh asgjë. Përkundrazi, leku vijon të forcohet ndaj euros.
Në një ekonomi tregu funksionale, paqëndrueshmëria politike dhe trazirat sociale janë ndër faktorët që ndikojnë drejtpërdrejt në besimin e investitorëve.
Në situata të tilla, bizneset e huaja mund të pezullojnë investimet, investitorët të zhvendosin kapitalet drejt vendeve më të sigurta, ndërsa qytetarët dhe kompanitë të kërkojnë mbrojtje duke i kthyer kursimet nga monedha vendase në valutë.
Por çuditërisht, duket se asgjë nuk e tund Lekun.
Sipas të dhënave zyrtare të Bankës së Shqipërisë, më 13 tetor një euro këmbehej mesatarisht me 91.49 lekë. Më 14 tetor kursi zbriti në 91.29 lekë, ndërsa më 15 tetor euro u dobësua më tej, duke arritur në 91.28 lekë.
Kjo ecuri sugjeron se faktorët që kanë mbështetur forcimin e Lekut deri tani nuk janë shqetësuar fare nga zhvillimet e fundit. Oferta e valutës në treg vijon të jetë e mjaftueshme për të mbajtur euron nën presion, pavarësisht pasigurisë politike. /skyweb.al
