Tregjet botërore financiare patën luhatje të ndryshme sot, ndërsa çmimi i naftës u rrit pasi Irani kërcënoi se mund të bllokojë eksportet e karburanteve nga Lindja e Mesme, pas rifillimit të bllokadës amerikane ndaj porteve iraniane, sipas AP.
Rritja e vlerave të aksioneve (bursave) ishte e kufizuar për shkak të frikës se SHBA-ja dhe Irani, mund të rikthehen në një konflikt të gjerë ushtarak.
Sulmet e reja në Lindjen e Mesme kanë rritur shqetësimet se mund të pengohen transportet e naftës dhe gazit përmes Ngushticës së Hormuzit, një nga rrugët më të rëndësishme të transportit të energjisë në botë.
Garda Revolucionare e Iranit, një forcë e fuqishme ushtarake iraniane, kërcënoi sot se, do të ndalojë eksportet e naftës dhe gazit nga i gjithë rajoni i Lindjes së Mesme, si përgjigje ndaj bllokadës amerikane.
Presidenti amerikan, Donald Trump njoftoi të hënën se SHBA-ja kishte rikthyer bllokadën ndaj porteve iraniane, pasi marrëveshja e përkohshme për përfundimin e luftës kishte dështuar.
“Eksporti i naftës dhe gazit nga rajoni do të jetë ose për të gjithë, ose për askënd”, thuhej në deklaratën iraniane.
Çmimi i naftës së papërpunuar “Brent” u rrit me 0,6% duke arritur në 85,23 dollarë për fuçi, ndërsa nafta amerikane u rrit me 0,7%, në 79,89 dollarë për fuçi.
Analistët thonë se situata në Gjirin Persik po bëhet gjithnjë e më e rrezikshme dhe transporti detar, po ngadalësohet për shkak të frikës nga sulmet dhe përshkallëzimi i konfliktit.
Në bursat aziatike, Seuli shënoi rritjen më të madhe, me indeksin kryesor që u rrit me 6,2%, falë rikuperimit të aksioneve të kompanive të çipave elektronikë.
Aksionet e prodhuesit të çipave “SK Hynix” u rritën me 8,8%, ndërsa ato të “Samsung Electronics” me 6,3%.
Në Evropë, tregjet patën lëvizje të ndryshme: Bursa e Parisit u rrit me 0,5%; Bursa e Gjermanisë ra me 0,5% dhe Bursa e Londrës ra me 0,2%.
Në SHBA, aksionet regjistruan dje një rritje, pas të dhënave që treguan se inflacioni ishte më i ulët nga sa pritej.
Indeksi i bursës amerikane “S&P 500” u rrit me 0,4%, ndërsa indeksi “Nasdaq” u rrit me 0,9%.
Investitorët po presin gjithashtu raportet financiare të kompanive të mëdha globale për të kuptuar gjendjen e ekonomisë.
