Kryeministri Edi Rama ka vendosur sërish mëngjesin e sotëm karrige përpara godinës së Kryeministrisë, duke përsëritur ftesën për dialog me studentët dhe qytetarët që prej disa ditësh protestojnë në Tiranë.
Por këtë herë ka ndryshuar lloji i karrigeve. Ndryshe nga dje, kur përpara Kryeministrisë u vendosën karrige të tjera, të cilat më pas u thyen nga protestuesit, sot janë përdorur karrige plastike.
Megjithatë, mesazhi i kryeministrit mbetet i njëjtë: protestuesit duhet të distancohen nga dhuna dhe të ulen në tryezën e dialogut.
“Ka një mijë e një pakënaqësi, një mijë e një halle, një mijë e një probleme, mund të ketë edhe 1001 arsye për të protestuar, por asnjë arsye nuk e justifikon dhunën”, deklaroi Rama.
Sipas tij, çdo pakënaqësi duhet të shërbejë si argument për komunikim dhe jo për përplasje mes qytetarëve.
“E drejta e protestës është e pamohueshme, dhuna është krim i ndëshkueshëm. Dje dialogu mori përgjigjen e dhunës. Sot dialogu është këtu përsëri”, u shpreh kryeministri.
Rama theksoi se mbetet i gatshëm të diskutojë edhe me ata që kanë mendime të ndryshme nga të tijat apo nga qëndrimet e mazhorancës.
“Dora ime është e shtrirë për këdo që mendon ndryshe nga unë”, deklaroi ai.
Megjithatë, kryeministri paralajmëroi se personat që dëmtojnë pronën publike dhe private gjatë protestave do të përballen me pasoja ligjore dhe financiare.
“Distancohuni nga dhuna dhe çdo dhunues do të marrë përgjigje. Përgjigja do të jetë konstante, ligjore dhe financiare. Kush dëmton pronën e përbashkët dhe pasurinë e tjetrit do të paguajë”, tha Rama.
Kryeministri këmbënguli se kërkesat për përmirësimin e kushteve të jetesës dhe zgjidhjen e problemeve sociale duhet të adresohen përmes punës dhe dialogut.
Kështu, pas karrigeve të thyera një ditë më parë, Rama ka zgjedhur t’i rikthejë ato përpara Kryeministrisë, këtë herë plastike, duke përsëritur ftesën për bisedime.
Mbetet për t’u parë nëse protestuesit do t’i përgjigjen thirrjes së tij apo nëse karriget e vendosura për dialog do të mbeten sërish bosh. /skyweb.al
