Ermal Beqiri, vijon të mbahet në burgun e Beauvais, ndërsa përpiqet të fitojë lirinë dhe të qëndrojë në Francë.
Kështu raporton së fundmi media franceze Courrier Picard, Beqiri është paraqitur sërish përpara Dhomës së Hetimit të Gjykatës së Apelit në Amiens, ku ka kërkuar lirimin e tij. Vendimi i gjykatës pritet të merret të premten.
Historia e biznesmenit shqiptar është vënë në qendër të vëmendjes për shkak të pasurisë së konsiderueshme që zotëronte në Francë.
Sipas medias franceze, pasuritë e lidhura me të përfshijnë një kështjellë në departamentin e Oise, rreth 2,1 milionë euro në llogari bankare, një avion të vogël dhe, sipas raportimit, edhe dy apartamente në jug të Francës, automjete dhe një jaht.
Ermal Beqiri ka mbërritur në Francë në moshën 16-vjeçare. Gjatë viteve, ai është profilizuar si sipërmarrës dhe ekspert i teknologjisë së informacionit, duke ndërtuar një karrierë që, sipas raportimit, është shoqëruar me një rritje të shpejtë ekonomike.
Aktualisht, biznesmeni ndodhet në burgun e Beauvais, ndërsa autoritetet shqiptare e kërkojnë përpara drejtësisë.
Çështja tashmë është në duart e autoriteteve gjyqësore franceze, të cilat pritet të vendosin nëse kërkesa e tij për lirim do të pranohet.
Vendimi i së premtes pritet të jetë një moment i rëndësishëm për të ardhmen e Beqirit në Francë./skyweb.al
