Pasqyrat financiare që bizneset depozitojnë çdo vit në Qendrën Kombëtare të Biznesit do t’i kalojnë automatikisht administratës tatimore, përmes një sistemi elektronik të shkëmbimit të informacionit ndërmjet institucioneve.
Ndryshimi është pjesë e vendimit të miratuar nga qeveria më 21 tetor, i cili rishikon procedurat e regjistrimit dhe publikimit të të dhënave të bizneseve në Shqipëri.
Sipas rregullave të reja, sapo një subjekt të depozitojë bilancin dhe dokumentacionin shoqërues në QKB, sistemi elektronik do t’ia transmetojë automatikisht këto informacione Drejtorisë së Përgjithshme të Tatimeve.
Kjo do të mundësojë që administrata tatimore të ketë akses të drejtpërdrejtë në të dhënat financiare të depozituara nga subjektet, pa qenë e nevojshme që informacioni të përcillet manualisht nga njëri institucion te tjetri.
Shkëmbimi automatik do të përfshijë jo vetëm bilancin, por edhe dokumentacionin shoqërues dhe datën kur biznesi ka kryer depozitimin.
Në këtë mënyrë, Tatimet do të mund të krahasojnë më lehtë të dhënat e pasqyrave financiare të regjistruara në QKB me informacionin që subjektet deklarojnë për qëllime fiskale.
Vendimi parashikon gjithashtu që bizneset të depozitojnë pasqyrat financiare në format elektronik të strukturuar, ndërsa raportet shoqëruese të paraqiten në format PDF, sipas kërkesave ligjore.
Dokumentacioni do të përfshijë bilancin dhe pasqyrat e tjera financiare vjetore, raportin e ecurisë së aktivitetit dhe raportin e auditimit ligjor në rastet kur ai kërkohet nga legjislacioni.
Një tjetër ndryshim lidhet me mënyrën si QKB do të trajtojë aplikimet me dokumentacion të paplotë apo me pasaktësi formale.
Në këto raste, QKB do të refuzojë depozitimin, duke sqaruar arsyet e refuzimit, ndërsa biznesi do të duhet të paraqesë një aplikim të ri pas korrigjimit të mangësive.
Megjithatë, QKB do të kryejë vetëm verifikimin formal të dokumentacionit, për sa i përket plotësisë dhe përputhjes me formatet e kërkuara, dhe jo një kontroll të përmbajtjes ekonomike apo saktësisë materiale të bilanceve.
Ndërveprimi i sistemeve mund të forcojë mundësinë e evidentimit të mospërputhjeve ndërmjet raportimeve financiare dhe deklarimeve tatimore, megjithëse vendimi nuk përcakton kontrolle të reja automatike apo penalitete të veçanta për këto mospërputhje.
Ndryshimet parashikohen të hyjnë në fuqi më 1 janar 2027, por zbatimi i tyre do të nisë pas plotësimit të kushteve teknike dhe përmirësimit të sistemeve elektronike të QKB-së.
Specifikimet teknike për shkëmbimin e informacionit do të përcaktohen me marrëveshje ndërmjet Qendrës Kombëtare të Biznesit dhe administratës tatimore./skyweb.al
