Dhoma Amerikane e Tregtisë në Shqipëri ka shprehur shqetësimin për situatën e krijuar gjatë ditëve të fundit, duke deklaruar se bizneset kanë mbetur të pambrojtura përballë dëmtimeve të pronës private dhe ndërprerjes së aktivitetit ekonomik.
Në një deklaratë zyrtare, AmCham u ka bërë thirrje qeverisë dhe institucioneve përgjegjëse që të garantojnë sigurinë publike dhe të marrin masa për të parandaluar përshkallëzimin e mëtejshëm të situatës. Sipas Dhomës Amerikane, informacionet e përcjella nga anëtarët e saj tregojnë se disa sipërmarrje po përballen me humbje financiare si pasojë e dëmtimeve dhe ndërprerjeve të punës.
AmCham thekson se pasojat e kësaj situate nuk kufizohen vetëm te bizneset, por prekin drejtpërdrejt edhe punonjësit dhe familjet që varen nga të ardhurat e tyre. Në këtë kontekst, institucioni ka kritikuar gjithashtu mënyrën se si janë trajtuar prej vitesh shqetësimet e komunitetit të biznesit nga politikëbërësit.
Sipas deklaratës, Dhoma Amerikane e Tregtisë ka paraqitur vazhdimisht rekomandime dhe propozime për ndryshime në projektligje, me synimin për të përmirësuar klimën e biznesit, por një pjesë e konsiderueshme e tyre nuk ka marrë vëmendjen e duhur nga institucionet publike.
AmCham vlerëson se tensionet e fundit janë tregues të problemeve më të thella që karakterizojnë mjedisin ekonomik në vend. Referuar Indeksit të Biznesit të Dhomës Amerikane, ndër shqetësimet kryesore të sipërmarrjeve vijojnë të jenë korrupsioni, monopolet, konkurrenca e pandershme, burokracia dhe informaliteti i lartë.
Në përfundim, Dhoma Amerikane paralajmëron se mungesa e sigurisë dhe përshkallëzimi i tensioneve mund të sjellin pasoja afatgjata për ekonominë shqiptare. Sipas saj, nëse qeveria dhe aktorët politikë nuk ndërhyjnë për të ulur tensionet dhe për të garantuar mbrojtjen e njerëzve dhe pronës, rrezikohet të dëmtohet më tej besimi i investitorëve vendas dhe të huaj për të investuar kapitalet e tyre në Shqipëri.
