Qeveria e Maqedonisë së Veriut ka miratuar vendosjen e sistemit të kontrolleve të përbashkëta kufitare “One Stop Shop” me Shqipërinë, një mekanizëm që synon të lehtësojë lëvizjen e qytetarëve dhe të ulë kohën e pritjes në kufi.
Me këtë vendim, Shkupi përmbyll procesin e zbatimit të këtij modeli me të tre vendet fqinje që nuk janë pjesë e zonës Schengen. Sistemi është tashmë në funksion me Serbinë dhe Kosovën, ndërsa për Shqipërinë mbetet vetëm nënshkrimi i marrëveshjes përkatëse mes ministrive të Brendshme të dy vendeve.
Faza e parë e zbatimit të sistemit do të nisë në pikën kufitare të Qafë Thanës, një nga pikat më të frekuentuara mes Shqipërisë dhe Maqedonisë së Veriut.
Më pas, modeli pritet të shtrihet edhe në pikat e tjera kufitare mes dy vendeve.
Zëdhënësja e qeverisë maqedonase, Venera Azizi, tha se sistemi do të mundësojë kalim më të thjeshtë, më të shpejtë dhe më të sigurt të kufirit, veçanërisht gjatë sezonit veror, kur fluksi i udhëtarëve rritet ndjeshëm.
“Kjo do të mundësojë kalim më të thjeshtë, më të shpejtë dhe më të sigurt të kufirit shtetëror, veçanërisht gjatë sezonit veror kur rritet ndjeshëm frekuenca e udhëtarëve dhe kur në të kaluarën qytetarët shpesh kanë ngritur shqetësime për pritjet e gjata në pikat kufitare”, deklaroi Azizi në konferencë për mediat.
Sipas saj, nevoja për këtë mekanizëm lidhet edhe me numrin e lartë të kalimeve kufitare mes dy vendeve. Vetëm gjatë vitit 2025, në pikat kufitare me Shqipërinë janë regjistruar mbi 4.5 milionë udhëtarë, ndërsa më shumë se 2.3 milionë prej tyre kanë kaluar nëpërmjet Qafë Thanës.
Autoritetet në Shkup vlerësojnë se sistemi “One Stop Shop” do të reduktojë ndjeshëm kohën e pritjes dhe do ta bëjë më efikas qarkullimin e qytetarëve në kufi.
