Kryeministri Edi Rama ishte i ftuar nderi në Konferencën Vjetore të Komisionit të Bllokut Lindor në Berlin, një platformë e sipërmarrjes gjermane që mbledh ekspertë të sigurisë, ekonomisë dhe inovacionit, si dhe përfaqësues të Bundestagut, Kancelarisë dhe trupit diplomatik.
Në fjalën e tij, Rama u ndal te sfidat me të cilat po përballet Europa, duke theksuar se lufta është rikthyer në kontinent, konkurrenca strategjike është bërë globale, ndërsa teknologjia po transformon ekonomitë, sistemet politike dhe mënyrën se si shoqëritë ndërveprojnë me njëra-tjetrën.
Kryeministri foli edhe për krizën demografike, të cilën e cilësoi si një kërcënim serioz për të ardhmen e afërt të Europës. Sipas tij, rënia demografike po riformëson rajone të tëra, ndërsa një “dimër demografik” po prek perspektivën e kontinentit.
Duke folur për Ballkanin Perëndimor dhe raportin e tij me Bashkimin Europian, Rama tha se rajoni ndodhet në zemër të Europës, por ende jashtë portretit të saj politik.
“Jam piktori më i madh mes kryeministrash. Ballkani Perëndimor është një rajon i tërë i rrethuar nga Bashkimi Europian, fizikisht i dizajnuar në zemër të Europës, por i përjashtuar nga portreti i Europës”, tha Rama.
Kreu i qeverisë shqiptare theksoi se Europës i duhet Ballkani Perëndimor, jo vetëm për arsye gjeopolitike, por edhe për pasuritë natyrore dhe potencialin që rajoni ka.
“Europës i duhet rajoni ynë. Kjo sepse ne jemi një rajon që kemi pasuritë tona natyrore. Këto pasuri janë të lakmuara nga Rusia dhe nga Kina. Mirëpo ne i përkasim kontinentit europian dhe duhet të zhvillohemi bashkë me pjesën tjetër të Europës”, u shpreh Rama.
Ai shtoi se Shqipëria po ecën shpejt në rrugën drejt integrimit europian dhe synon anëtarësimin në Bashkimin Europian përpara fundit të kësaj dekade.
“Ne jemi duke ecur shpejt drejt integrimit në BE. Ne duam që të bëhemi pjesë e BE-së përpara se të mbarojë kjo dekadë. Ne po bëjmë transformimin më të madh në historinë tonë”, tha Rama.
