Kursi i këmbimit në vend ka shënuar lëvizje të ndjeshme, me dollarin amerikan që ka rënë fort ndaj lekut sot dhe euron që vijon të qëndrojë në nivele të ulëta, e ndikuar nga sezoni turistik dhe prurjet e mëdha të valutës nga burime jobankare.
Sipas të dhënave të Bankës së Shqipërisë, një dollar u këmbye sot me 82.94 lekë, duke pësuar një rënie prej 0.77 lekësh krahasuar me ditën e djeshme.
Analistët e lidhin këtë zhvlerësim të shpejtë jo vetëm me forcimin e lekut, por edhe faktorë të jasjtëm sië janë efektet e tarifave tregtare të vendosura nga administrata e Presidentit amerikan Donald Trump, të cilat kanë ushtruar presion mbi tregjet financiare dhe mbi monedhën amerikane.
Ndërkohë, euro u këmbye me 97.22 lekë, me një ndryshim minimal prej +0.06 lekësh.
Euro mbetet në kuota të dobëta përballë lekut, e ushqyer nga rritja e ndjeshme e ofertës së valutës gjatë muajve të verës.
Në tregun e monedhave të tjera, paundi britanik zbriti në 112.52 lekë (−0.13), franga zvicerane u rrit lehtë në 103.34 lekë (+0.02), ndërsa jeni japonez (100 njësi) ra në 56.34 lekë (−0.07).
Rënia e fortë e dollarit dhe dobësimi i euros kanë ndikime të kundërta për bizneset shqiptare.
Eksportuesit drejt tregjeve europiane dhe amerikane përballen me të ardhura më të ulëta në lekë për të njëjtën sasi mallrash të shitur, duke ulur fitimet dhe duke rritur presionin mbi kostot.
Ndërkohë, importuesit përfitojnë nga blerja më e lirë e mallrave dhe lëndëve të para nga jashtë, duke ulur kostot e furnizimit dhe mundësuar çmime më konkurruese në tregun vendas në parim.
Pavarësisht kësaj, konsumatorët shqiptarë nuk po përfitojnë nga kursi i këmbimit për shkak të oligopolit në tregje të ndryshme siç janë për shembull ushqimet. /skyweb.al
