Emirjon Senja
Kompania low cost Wizz Air ka marrë dje në dorëzim një avion të ri fare – Airbus A321NX – duke vazhduar kështu traditën e saj për të pasur flotën më të re të avionëve në Europë, me një moshë mesatare prej vetëm 4.3 vitesh.
Avioni i ri i është dorëzuar nga vetë Airbus, dhe entuziastët e aviacionit shpresojnë që ai të bëjë ndonjë ndalesë edhe në Shqipëri në fluturimet e ardhshme të kompanisë.
Zgjedhja e avionëve të rinj nuk është rastësi për kompanitë low cost si Wizz Air. Modeli i tyre i biznesit mbështetet fort mbi efikasitetin: avionët e rinj konsumojnë më pak karburant, kanë kosto më të ulët mirëmbajtjeje, dhe përdoren maksimalisht gjatë gjithë ditës në rrugë të ndryshme.
Gjithashtu, duke u fokusuar vetëm në një prodhues avionësh – në rastin e Wizz Air, Airbus – kompania arrin të negociojë më mirë për çmime dhe kushte më të favorshme.
Në të njëjtën linjë, Ryanair ka zgjedhur të fokusohet vetëm te Boeing, duke ndjekur të njëjtën logjikë eficience dhe optimizimi. /skyweb.al
